《街霸×鐵拳》Demo版初回戰
《街霸》同《鐵拳》這兩套格鬥遊戲系列向來深受機迷歡迎，Capcom就打算在2012年推出《Street Fighter × Tekken》（SFxTK）的Crossover格鬥大作，讓這兩大陣營的角色來個大亂鬥。首個試玩版本已經運到香港，可以用上《街霸》同《鐵拳》兩派各7個角色，以雙人組隊方式互揪，打得爽快！
《街霸》同《鐵拳》嘅操作方式都幾唔同，《街霸》要Chok搖桿出招外，仲設有輕、中、重嘅拳腳共6個按鈕；而《鐵拳》系列只靠左、右嘅拳腳共4個按鍵嚟組合出各種招式，玩家預咗要花時間適應。
共通連續技系統
因為今次遊戲係由Capcom嘅《Street Fighter IV》團隊所開發，所以操作上會變成6個按鍵，《街霸》角色操控方式冇變，而《鐵拳》角色嘅左拳、右拳、左腳、右腳，會變成輕拳、中拳、輕腳及中腳，而剩低落嚟嘅重拳同重腳就留作出連續技時使用。今次《SF×TK》還引入共通連續技系統，無論使用兩派中的任何角色，只要順次序按輕、中、重、重的拳或腳即可使用連續技，而連續兩下重拳或重腳，或者同時按重拳加重腳，都可以將敵人打到飛起，雖然操作上明係偏頗《街霸》玩家，但都算易上手。
夾時間換人駁招
今次《SF×TK》在美術方面都係用上《SF4》嘅水墨式畫風，話就話係Crossover作品，但實情係以《街霸》角色為主，《鐵拳》角色為副，但遊戲所採用嘅雙人組隊作戰形式，就跟番《鐵拳》系列嘅Tag Mode，只要其中一個角色被打死就當輸，所以在適當時候㩒中拳加中腳換人係致勝關鍵。唯一要注意嘅係換人中途會有短暫硬直時間，好易被對手狂打，而且在危急關頭時換人，更需要耗用一格能源，不過就可以免除硬直時間，若然時間夾得好，還能夠合作發動連續技，令威力增倍。
14個角色任配搭
《SF×TK》預定要到2012年春季才會登場，現時仍未公布晒所有登場角色，因為淨係計《街霸》跟《鐵拳》遊戲內嘅人物，加埋都有過百位，冇可能全部落晒。試玩版中只設有14個角色，《街霸》方面有Ryu、Ken、Sagat跟Cammy等，而《鐵拳》角色則有三島一八、Bob、Hwoarang同Julia等，玩家可以任意組合出戰。小記試玩時雖然覺得有好重嘅《SF4》影子，但部分細位設計都有改動，例如出招時嘅距離感便要重新掌握。除咗兩派角色外，遊戲仲會加入特別角色來增加新鮮感，已公布嘅係PS3版同PS Vita版可用PS名作《inFAMOUS》主角Cole，Capcom稍後應該會再有公布，行情值得睇好。
Info
類型：格鬥
平台：PS3、PS Vita、
Xbox 360
開發：Capcom
推出：2012年初
售價：待定
在E3遊戲展的PlayStation發布會上，已宣傳定會有《inFAMOUS》主角Cole可用。
始終要兼顧兩個遊戲系統，細位設計亦有新平衡，玩家預咗要花一段時間適應。
採用共通連續技系統，按輕、中、重、重的拳或腳即可出招，滿足到兩派玩家嘅利益。
換人期間若夾啱時間，更能合作發動連續技。
始終係出自《SF4》製作團隊之手，所以美工方面都用番《SF4》嘅水墨畫風。
Cole絕技幾乎全部可在《SF×TK》中使出，更可用武器作出攻擊。
繼之前《Mortal Kombat》加入戰神Kratos後，《SF×TK》則會有《inFAMOUS》Cole登場助陣，Crossover玩唔停。
試玩版已用到14位角色，每邊各有7位人物可用。
SCEH今次預先畀傳媒試玩《SF×TK》外，仲搵來模特兒Cosplay《鐵拳》Julia同《街霸》春麗，都算似模似樣。