毛毛×大眼仔 眼碌碌靠嚇

早前Pixar喺香港搞咗個展覽，披露多年嚟Pixar工作室眾多搞笑角色嘅誕生過程，令人大開眼界之餘，筆者仲上埋癮，打算開始儲呢班角色嘅精品。最近山口式「特撮Revoltech」唔只有胡迪再版，仲有全新作品《怪獸公司》（Monster,Inc.）。雖然有討論區話頂唔順毛毛由可愛啤梨肚變成嘔心昆蟲肚，但係玩過實物後，又唔係咁差，況且唔使$300就可以玩埋手動碌眼設計，都幾盞鬼吖！

有人話山口式例必穿崩位多，唔多啱睇，不過今時唔同往日啦！新款已經大有改善，就以毛毛為例，上半身有一塊軟膠組件包實頸位連兩邊膊頭，手肘又有一塊，遮到轉輪關節又唔影響可動性。而且為咗強化毛毛上身嘅活動能力，廠方大膽幫毛毛收身，再喺胸口加多一個關節，方便左右扭動，最初睇可能唔順眼，但玩落又幾扭得喎。

面部表情削咗啲

有毛毛，又點少得佢嘅綠色老友記！隨盒就有埋同比例嘅大眼仔，可動性只限於連接本體嘅手腳，手肘硬晒軚冇得屈曲，不過雙腳接地性都OK，唔使搵嘢撐住都企到。而且毛毛同大眼仔都可以手動玩碌眼，拆開頭部，就可以扭轉眼睛背後嗰支棍仔，用嚟調節眼神方向，名副其實做到眼仔碌碌。可惜毛毛只得開口Look及微笑Look兩款面部組件替換，表情唔夠豐富，又冇跟埋可愛阿Boo，唔知日後會唔會出升級版補數呢？

查詢：2148 9483（精品）