男士終極偶像HT 1/6玩具獵人

《城市獵人》冴羽獠，可能你會冇印象，但一講到孟波，就冇可能唔識啩！呢個人到中年、對女裝底衫褲有強烈癖好嘅鹹濕佬，同時又高大威猛兼且身懷絕技嘅City Hunter，令男人既羨慕又妒忌，最可恨係佢夾埋飛刀女刑警冴子齊齊殺入Figure界，無論你係Figure發燒友或者日漫狂迷，都要荷包大出血！

「即使沒筷子，改口食塊多士，陪孟波打打Game Boy睇電視……」呢首《城市獵人》主題曲，當年唱到街知巷聞，就連成龍及周文健都喺電影扮過。時隔多年，唔只有韓劇翻拍，而且進軍1/6 Action Figure舞台，並由大廠Hot Toys炮製，令人睇高幾線。

CMS第二炮

除咗Movie Masterpiece Serice（MMS）電影系列，近年HT亦積極開拓另一條產品線 — Comic Masterpieces（CMS），顧名思義由漫畫界揀蟀，繼《20世紀少年》嘅朋友打響頭炮後，第二炮由《城市獵人》接棒，HT如此解畫︰「雖然《城市獵人》故事已經完結咗好多年，但係角色、情節依然深入民心，加上被視為續集嘅《天使心》喺日本反應唔錯，日本HT遂向原作者北条司先生洽談版權，難得對方一口應承，《城市獵人》 Project就正式展開。」

最猥瑣Figure

咁經典嘅角色，HT梗係要嚴陣以待，先由日籍雕刻大師林浩己雕頭，再交由JC.Hong及Yulli分別負責塗色及監修。炮製漫畫Figure看似簡單，其實神髓比真人仲難掌握，HT經過多次修改，先有今天較為神似嘅試辦出現。為求貼近原著，仲特別將Body嘅胸口加大，腳又駁長啲，呈現漫畫中「九頭身」嘅Fit爆身形；最爆笑係送多一個「淫魔」Look畀你換，襯埋Lace Bra，堪稱當今最猥瑣Figure。

惠香不日推出

武器方面，孟波只有357左輪及M14狙擊步槍各一把，唔及同步推出嘅歡喜冤家野上冴子咁齊架生，後者有個專對付色狼嘅大鐵錘，雖然唔係用鐵造，不過塗裝都好有金屬感，加上用料係PVC，夠輕身，揸上手擺甫士都唔怕「不舉」。可惜係冴子嘅頭雕同漫畫比，似乎有相當程度落差，軟膠頭髮亦有欠自然，期望大貨時可以改善啦！特別一提的是，HT話今次反應好嘅話，其他經典角色，好似惠香及海怪都會陸續登場，「獵人」粉絲梗係想要全家福啦！