山口新Getter　玩篷擺甫

早前EX合金真三一萬能俠一號機嘅定價及品質風波，令唔少玩具迷大動肝火，尤其是對翼脆弱不堪，點值幾千銀嘅售價？其實玩三一又唔一定要銀包大出血，差唔多同一時間，山口式亦都出咗Renewal版三一一號機，唔只售價親民得多，仲加入百變斗篷元素，而且用料夠實淨，點扭都得，唔似玩EX合金咁膽戰心驚。

最近推出嘅山口式，每款都有強烈主題，Gimmick位夠晒獨創，又切合機體特性，EVA二號機跟旋風腿台座就係好例子。今次嘅新版Getter 1就將焦點放喺劇中可防禦一切攻擊嘅斗篷上，山口式唔係普通軟膠製一幅過，而係將斗篷分成4件，再喺背面及邊緣等位置布滿插孔，配合堅固嘅轉輪關節，就可以實實淨淨扭出各種甫士。譬如將斗篷向單一方向連接，就變成空中飄揚狀態；將斗篷作環狀重疊連接，再圍喺膊頭，就重現衝刺時披風旋轉Look，總之可因應各位嘅創意，將斗篷任意調校，甚至畀你擺出原創甫士。

武器少　特效配件補數

正如原著一樣，新版Getter 1嘅武裝其實都幾寡，基本上只有一對回力斧，就連OVA嘅Machine Gun都欠奉，稍稍安慰係廠方炮製咗3款特效配件，提高擺甫士時嘅氣勢。當中包括之前嘅山口式已經有嘅踏腳特效配件，以及今次新增嘅爆風效果配件，可以用喺斗篷防禦甫士上，視覺Effect出晒嚟。不過令人奇怪係肚臍使出必殺技「Getter Beam」嘅光線發射效果配件，唔係直接插喺身體上，而係間接安置喺台座上，除咗唔想破壞Getter 1主體嘅造型完整性外，我真係諗唔到第二個理由解釋囉！

夠靈活　Ball Joint少穿崩

講番整體造型，新版Getter 1跟舊版大致相同，不過靈活性就有大幅改善，除咗頭連頸用咗雙重關節，膊頭上下前後嘅扭動幅度更可以「誇張」形容，而且成隻小腿可以向後屈起，髖關節嘅活動幅度又夠大，令Getter 1雙腳做到紮馬呢啲大動作，最正係大部分Ball Joint位都隱藏起嚟，唔似舊版穿晒崩。不過，雖然Getter 1擺甫士冇難度，斗篷又唔易爛，不過裝咗斗篷之後，其實唔易企穩，況且都係飛行甫士最襯佢，所以都係用展示台座穩陣啲。

查詢：2148 9483 (精品)