祼眼激凸摺機 007SH防水拍3D

最近到東京旅行，發覺多咗日本人轉用智能手機，不過就唔係iPhone，反而係一眾變種Android Phone。鬼咩！Android採用開放式平台，不但處理器隨你配搭，仲玩到防水、防塵甚至裸眼3D，而最近SoftBank 007SH更將Android注入傳統摺機內，既可篤芒又有Keypad方便打電話，雙向輸入，就算有SIM Lock都要搶！

日本市場向來封閉，當地居民大多使用本土產品，外國品牌很難打得入！但自從SoftBank正式引入iPhone後，日本人漸漸意識到Smartphone真係相當好用，間接搞到愈來愈多Android瀛機出現，而今次的007SH則是首部摺機款。

180°後翻屏幕

Android發表至今，Google對手機Form Factor都沒有硬性規定，只是為了用盡其觸控特點，手機大多以大芒掛帥。然而，總有人懷念實體按鍵嘅方便，所以今次Sharp就跟SoftBank合作，推出首部摺疊瀛Phone，將主頁、目錄、搜尋及返回「4大天王」鍵放晒入Keypad內，配合傳統數字鍵，打字跟撥號都同樣方便。受設計所限，007SH屏幕只有3.4吋，但解像度就高達480×854，並採用了超高對比度嘅New Mobile ASV顯示技術，畫面靚到痹！而且一如過往嘅東瀛摺機，屏幕都可180°向後翻，上蓋更設有一個0.7吋OLED小屏幕，唔使開蓋着芒就睇到訊息同來電號碼，夠晒慳電，傳統大芒Android機就冇呢個賣點。

落水影3D相

系統方面，007SH採用了Android 2.3系統，處理器則係Qualcomm MSM8255，速度達1GHz，但翻查資料便會發現，處理器應可行到1.4GHz或以上，因此資深玩家大可安裝Apps作適量超頻。然而相比起速度，其3D及雙防功能反而更值得關注。3D方面，佢支援裸眼立體顯示，只要切換至3D介面，毋須戴眼鏡都會見到Icon浮晒出嚟，而且可手動調校立體度，勁細心！至於雙防功能，則包括了防水同防塵，前者符合IPX5/IPX7標準，即可在水深1米下連續使用30分鐘，最正係落水時可用埋個3D鏡頭嚟影相，影水着保證更加「激凸」！

仍設SIM卡鎖

提到影相，007SH仲有大把嘢講，好似採用了CCD感光元件，鏡頭像素高達1,610萬，並支援720p高清攝錄、人臉對焦、篤芒對焦、30秒曝光及ISO 12800超高感光度等。若嫌以上功能太大路，佢還預載咗一個叫「Mosimo Camera 3D」嘅App，可在拍攝立體相時加入星星、花花等多款卡通圖案，卡娃兒到爆！其他功能還包括藍芽3.0、HDMI輸出及802.11n無線上網，基本上諗得到嘅規格佢都有齊，惟要注意007SH並未如同期的DoCoMo手機般取消SIM卡鎖，所以依然要硬解兼有圈外問題，亦要透過日本五十音來輸入中文，買之前要考慮清楚！