環法單車賽Apps 直擊戰況

單車界年度盛事「環法單車賽」（Tour de France）七月初開鑼，一如以往，賽事為期二十多日，唔單止考驗車隊策略及車手耐力，連帶車迷都要日日Mon實比賽戰況。好在環法官方App《Official 2011 Tour de France》剛剛上架，連同幾間主要車隊自行開發的Apps，咁就可以每日直擊西班牙車手干達度（Alberto Contador）點樣衞冕啦！

文字直播 《Official 2011 Tour de France》費用：US$0.99

單車賽事時間長，而且今屆環法仲有成21站比賽，要坐定定睇直播一啲都唔容易。這款由官方推出的App方便在提供文字直播，而且每分鐘都會更新，仲有車手的實時GPS定位，就算坐喺Office都可以睇實現場戰況。如果嫌文字直播太單調，仲可以睇番每站的精華片段，夠晒原汁原味。

大熱車隊 《Rabo Cycling》費用：免費

環法比賽除了是車手個人的耐力挑戰外，車隊策略更為重要，今屆就有多達22隊車隊參賽。要緊貼來自荷蘭的熱門車隊Rabobank的話，就要下載呢款《Rabo Cycling》。新App提供了大量有關環法賽事的資料，包括車手簡介、賽道特點、最新排名、地圖等等，未開賽就可以刨定資料，還會提供往後多場單車賽事的賽程，單車迷必備！

鬥車減肥《Cyctastic》費用：US$5.99

眼見各隊車手鬥得如火如荼，難免會挑起各位心中的踩車癮。想踩車踩得有效率，就要下載《Cyctastic》。此App支援GPS功能，可以將用家位置即時定位，從而記錄踩車時間、距離以至卡路里消耗量等，最適合減肥之用。如果平時有約開朋友踩車的話，仲可以同佢哋一齊開啟Competition模式，踩車時程式就會發聲提示誰是領先車手，似足專業比賽！

英國王牌《Team Sky Cycling》費用：免費

來自英國的Team Sky車隊雖然成立短短兩年多，不過目標明確，就是要培育一名英國籍的環法總冠軍車手，想知道車隊王牌Bradley Wiggins可唔可以幫車隊達成夢想，《Team Sky Cycling》就幫到你。App內會全程直擊Team Sky的比賽狀況，就連車手感受、車隊花邊消息、圖庫、車手Blog都有收錄，資料齊全，不容錯過。

單車秘笈《活動王》費用：免費

《活動王》提供了大量單車機件的資料，更貼心地分為新手上路、升級、維修等五大類別，例如開車之前要檢查清楚車輪、煞車系統以及遇上緊急事故時的對策，又或者介紹踩單車的正確姿勢，避免不必要的勞損和受傷，而且每項資料都圖文並茂，保證初哥都睇得明。不過要留意的是，由於程式是由台灣人開發，所以用語與香港略有不同。