Chat Room

家庭版 記者Rachel L

黃子華再演舞台劇，無論他做棟篤笑還是做舞台劇，都值得欣賞，因他總會以新角度去思考，提出獨特又具啟發性的想法，每次演出都總會「畀到啲嘢你」，不是笑完一輪的疑似Talk Show可比擬。雖然在鼓吹和諧的社會，思想單一方便控制及管理，但事情不能永遠從單一角度出發；只是當你提出不一樣的想法時，總被批評為好辯、無事生非，一句「唔好搞咁多嘢啦！」恍似是王命，惟有在大家能接受更多新思維時，世界才是真正的Marvellous！

家庭版 記者Rowena

懷着興奮嘅心情向澳門出發；結果懷着沉重嘅心情返港，為咩唔開心已唔記得，只記起上船嗰陣嘅插曲─跟朋友A遞出船飛一刻，職員指着前面的船話：「你哋坐呢班，快啲上船。」我話：「唔係喎，我哋係坐噴射船喎，點解轉咗o架？」朋友A隨即鬧我：「一味貪平，搞到要坐三體船，實拋到七彩！」踏入船艙，啲座位竟然係渡海小輪式木櫈。心諗：「仲要坐個幾鐘才返到香港，點捱呀？」突然，船上傳來響鬧聲……原來係發夢，我嘅澳門之行仲有個幾禮拜才開始！

家庭版 編輯 Yuk

閒來無事，在家中玩黏土手作，平時總會做些好友喜歡的東西，在對方生日、結婚的日子送上一點心意，婚照相架、吊墜頸鏈、蛋糕擺設等，即使要通頂製作，看見對方收禮物時的笑容，也於願足矣。最近做的這個朱古力+雪糕+忌廉吊墜，卻並非為了誰，只是見坊間愈來愈多少女系手作飾物，好奇的我也做做看，不到1、2小時的工夫即成，同類貨品有些店舖可賣過百元呢！話說回來，我對這作品不太滿意，所以一直把它擱在一旁。做事有Heart和無Heart，感覺真的大不同。