重遊仙境 追兇狂劈 《Alice：Madness Returns》
Spicy Horse將大家由細睇到大嘅童話故事《愛麗絲夢遊仙境》（《Alice in Wonderland》），改編成這個比添布頓更黑色的《Alice：Madness Returns》，故事講述離開精神病院的愛麗絲，重遊仙境調查全家人離奇遇害的真相，唔單止要用餐具做武器打低敵人，還以Peter Rabbit來製造定時炸彈，設計意念都幾破格！
故事情節 黑色詭異
何以講係「重遊仙境」？查實2000年曾經出過第一集《Alice》，當年只推出PC版，其黑色風格都得到唔少機迷的青睞，但估唔到一等就10年有多先推出續集。冇玩過第一集都唔緊要，事關上集過後愛麗絲所有親人都在大火中被燒死，而佢亦因為咁而大受刺激，要入住精神病院治療，今集就係講佢被放出院後再入仙境查明真相。可能見相隔咗咁多年，就算玩過第一集嘅朋友都未必會有印象，所以開發小組今次就再度復刻番第一集PC版，預訂咗《Alice：Madness Returns》嘅買家可以憑Code上官網下載第一集翻玩！
解謎過關 富挑戰性
點解小記咁睇好《Alice：Madness Returns》可以黑馬跑出？靚畫面、熟悉的故事、有趣武器跟角色設計，以至富挑戰性的解謎元素都有齊，比起好多同類型遊戲只求純粹官能刺激，隨便整幾隻超巨型怪獸頭目有誠意得多。新遊戲設有6個仙境版圖，設計上都係走添布頓的黑色風格，而且每個版圖所用上的謎題都好唔同，每次都要諗計仔過關，例如飲藥水將自己變細先可以找出隱藏路線過版，幾富挑戰性。另外，遊戲入面的敵人有時都唔易應付，要解決玩人海戰術的兵仔，只要使用上集的Vorpal刀亂劈就掂，但睇過電影嘅朋友都知道，撲克牌衞兵並唔容易對付，呢個時候就要用上偽裝成Peter Rabbit的定時炸彈炸暈佢哋，然後再繞到身後攻擊。
武器防具 新奇有趣
兔仔定時炸彈都未算特別，其實愛麗絲使用的武器件件都新奇有趣，例如餐枱上的胡椒樽交到佢手上就變成了機關槍，茶壺則變成榴彈發射器，兩者都可作遠距離攻擊；而且只要夾準時間開遮，仲可以將敵方頭目掟出來的火球同物件反彈開去，是一件非常有用的防具；就算原有的Vorpal刀跟木馬棒槌，在新一集中都可以分為輕重攻擊兩個層次，加上每種武器都有專屬按鈕，方便快速切換，唔使入菜單慢慢揀，打得爽快！
Info
類型：動作冒險
開發：Spicy Horse/EA
平台：Xbox 360、PS3
推出日期：6月14日
售價：待定
查詢：3166 6001
場景設計充滿黑色風格，仲誇張過添布頓！
弱質纖纖的愛麗絲，打鬥時一啲都唔輸蝕。
遊戲充滿異域風情，連日式燈籠都在畫面出現。
劊子手拎住把大鐮刀，睇見都知道唔好惹。
場景設計美輪美奐，落足心思。
遊戲以Unreal Engine 3引擎開發，畫面流暢度高之餘，出招亦夠晒華麗。
謎題難度唔低，但解謎的同時都考埋大家的操控能力。
拎住支胡椒樽就可當作機關槍使用，認真妙想天開。