《Forza Motorsport 4》遊戲靚車盡出

今次E3遊戲展，小記真係忙到飛起，開Show前已經要去勻各廠商在不同地方舉行的全球Media Briefing；到展覽會進行期間的晚上，又有大大小小的遊戲Party，但辛苦還辛苦，好似《Forza Motorsport 4》這個豪華靚車派對，就幾趕都要到，試玩反而係其次，場內靚車之多，已經叫人目不暇給！

《Forza Motorsport 4》將會在今年10月登場，今集無論在畫面、遊戲內容、操控體驗都比前作做得更好，亦唔似對家《GT》系列咁要等好幾年先有新一集推出。

對應Kinect操作

今集遊戲改進之處相當之多，例如在示範一段高反差的阿爾卑斯雪山賽道時，光源效果都夠晒自然，抵讚；而且在車房內鑑賞名車時，每個細小零部件都做得相當仔細，反光位亦似到十足，如果配埋Kinect的話，更可以「親身」行前行後睇車，甚至「親手」揭開車門，同時亦唔使用手掣揸車，兼可頭擰擰來調整視點。

星級試車手撐場

不過可能見Party都旨在Social，所以試玩嘅只係一條冇對手的簡單賽道，但就一樣提供埋三芒駕駛座及全新的U型無線駕駛手掣，仲可以上台挑戰最快圈速贏取獎品。新手掣內置加速感應器，轉向時的效果都幾唔錯，好有揸車的實感，係爭在做唔到真正搶軚嘅效果。今次試玩派對豪就豪在將幾十架喺遊戲內出現的靚車，擺晒出嚟畀大家慢慢欣賞，儼如小型車展，甚至連跟《Forza Motorsport 4》合作的人氣電視節目《Top Gear》，都安排星級試車手The Stig撐場，現場反應High爆。

Ubisoft宣布推出Wii U遊戲

Ubisoft亦一如以往在洛杉磯Downtown的Los Angeles Theater舉行自家的遊戲發布會，今年主打遊戲分別有《Assassin's Creed Revelations》，場景由以往的意大利轉到君士坦丁堡玩暗殺；而《Far Cry 3》就加入新武器；至於賤兔新作《Raving Rabbids：Alive and Kicking》則對應Kinect，可用腳踩賤兔，有趣抵死。Ubisoft更公布會在Wii U平台推出《Ghost Recon Online》、《Assassin's Creed》系列作以及全新射擊遊戲《Killer Freaks From Outer Space》，行情值得看好。

Info　

類型：模擬駕駛　開發：Turn 10　平台：Xbox 360（對應Kinect）　推出日期：10月