Chat Room

家庭版 記者Ivy

早前因為採訪，認識了一班青春活潑的新進女子組合，適逢今次主題是夏日收身，被5個高過又瘦過自己的女子包圍，我一邊按住自己的「大餅臉」，向身旁的攝影師講咗不下10次：「點解佢哋塊面可以咁細！點解？！」受到如此衝擊，完成訪問後，我沒有理會早上起床時輕微扭親而作痛的右腳，拖着疲乏的身軀，持着「要減肥」這個堅定的意志走到泳池，進行今年夏天的第一次「下水禮」；而當我興奮莫名地施展我第一下蛙腳的時候，我……左腳抽筋……

家庭版 編輯Denise

因為一套韓劇《原來是美男》，我比人遲了10多年栽進韓流，結果同時迷失在韓式綜藝節目的世界。韓式綜藝節目，完全沒有港式節目一味浪擲食物的「費時失事」，主持人也不會說有味笑話來博假高潮，由道具到布景以至參與人物，全部認認真真，亦因為認真，所以好看。也別說我只往別人臉上貼金，強烈推介本人近來的「主題曲」：林海峰的《安多芬與我》，堪稱正中各中佬中女心事，每聽一次，心裏便熱血多一遍，Fighting！

家庭版 記者Rowena

6呎高男友人，有個搞鬼花名叫「黃蜂」。上年同佢去桂林玩，同團嘅嬸嬸忽然同身邊嘅伯伯講：「佢個樣好似靚仔黃宗澤Bosco！」我指住佢傻笑：「3折Bosco就有佢份，打折後剩番嘅係大家都姓黃、身份證上都係男性！」因為佢成日扮Chok樣，歌聲八成似林峯，於是就幫佢起名叫黃蜂Bee Wong；佢都有威水史，就係奪得朋友公認嘅亞太區（即亞皆老街及太子區）最受歡迎男歌手。不過這些笑聲已隨着黃蜂北上搵真銀而成為回憶，惟有喺度高歌──我是真心捨不得你走……記得返嚟搵我哋呀！Miss U！