洛杉磯直擊 聲控操作 大打出口

去年底Kinect正式搶灘，反應相當不俗，今屆E3遊戲展當然有一系列Kinect新作發布。現有的Kinect遊戲多數以Casual玩家為主，但今年展出的Kinect遊戲就開始走向主流機迷市場，除體感操控外，還大玩聲控功能，唔止要玩到郁手郁腳，出埋口術都仲得，未試過都唔知打機原來可以咁搞鬼！

E3遊戲展現場花絮

雖然唔係隻隻新Game都擺响E3展覽會場內公開試玩，例如《Kinect Star Wars》等Kinect遊戲都被安排在獨立房試玩，但都無損玩家的心情，場內試玩區都一樣逼爆！

Kinect大作

體感拆槍

遊戲開創了體感射擊遊戲的先河，今次在Gun Smith模式內可以全程以體感方式改裝槍械，只需要雙手向橫一伸即可將槍械解拆，再自行改裝，畫面跟動作都型到震，而且在示範時更可用埋體感方式瞄準、上子彈跟Zoom in Zoom out，打破以往體感射擊遊戲的框框。

親口答題

《Mass Effect》系列向來在故事性跟動作射擊場面上都做得出色，仲會根據大家的對答來推進劇情，但今集支援埋聲控功能，可以開口回答問題，而且句子長度只係三幾個英文字，一般英語程度都應付得到。

原力揮劍

去年已經有《Star Wars》揮光劍片段出現在Kinect產品發布會，今年更有實Game可玩。遊戲畫面表現出色，操控方面仲跟足電影，左手運用原力隔空取物；右手揮動光劍攻擊敵人，垂下頭時角色就會向前衝向敵人，超級像真，仲可以支援到兩位玩家以分割畫面形式一齊作戰。

儲氣出招

作為《Fable 3》的後繼作品，今集最特別係用上Kinect體感操控，台上示範時先來個拉韁繩扮騎馬，然後落馬儲氣出魔法，有啲似早幾月推出的《Harry Potter》。

聲控換桿

第二集改玩另一批運動遊戲，小記即場試玩過高爾夫球，同樣可以用聲控指令換桿，都幾易上手；但當地玩家就鍾情美式足球，達陣成功仲興奮到同拍檔「Give me Five」添！

Xbox 360大作

創意程式

相對一眾主流遊戲，小品式的《Kinect Labs》就更見特別，可以用各種小程式發揮Kinect的多項潛能，如Object Scanning、Finger Tracking等新功能，簡單又好玩。

勁歌熱舞

去年推出的《Dance Central》大受歡迎，今年廠方自然唔會畀佢停，《Dance Central 2》的遊戲設計、畫面等元素基本上冇太大轉變，不過就加入更多歌曲，繼續勁歌熱舞。

似睇電影

遊戲示範就由主角在水底利用個人推進器炸爆潛艇揭開序幕，然後展開一連串海戰，擊沉戰艦後駕駛橡皮艇衝上水陸運輸機逃走，幕幕扣人心弦，仲刺激過荷里活一級片，推出時必買！

驚鴻一瞥

雖然播放的遊戲Trailer只得一分鐘左右，但Master Chief於最後一幕正式現身時更惹來全場狂呼，地位超然。不過宣傳片咁短，睇怕都要到明年先能夠玩到。

打新巨怪

去年E3中《Gears of War 3》係主角，今年都唔例外，台上示範片段係幾位主角合力殲滅連地台都咬得爛的金魚頭巨怪，超刺激，抵佢成為萬眾期待之作！