美國直擊！ iCloud+iOS 5 蘋果秋季Phone起「雲」湧

美國時間6月6日（星期一），蘋果教主Steve Jobs一如過往現身三藩市「全球開發人員大會」（WWDC）會場，雖然佢今次手上既冇新Macbook，又冇iPhone 5，但現場一樣掌聲雷動，事關新發表嘅Mac OS X（Lion）、iOS 5同iCloud雲端服務都充滿驚喜，當中iCloud就容許用戶把音樂、Apps及文件掟晒上雲端伺服器，然後同步到手機及電腦，最快今年秋季推出，而且費用全免，仲玩MobileMe？Out晒喇！

今屆WWDC 2011傳聞特別多，又傳Steve Jobs唔到，又話會有新iPhone，不過最後統統錯晒，新iPhone唔見影，而教主則依舊上台主持首場Keynote。現場所見教主比去年又瘦咗一圈，行路仲有啲腳震，但現場氣氛一樣咁正，講到部分新功能時，觀眾席更不時傳出歡呼聲。

iCloud 5GB空間免費任用

今年教主就揀咗iCloud作為重點發布，iCloud服務跟MobileMe概念有點相似，簡單來說就係由蘋果提供一個雲端儲存空間，用戶把手機或電腦資料經Wi-Fi傳上去後，系統就會自動同步到其他裝置，過程不經電腦，而且免費兼冇廣告，預計於今年秋季正式推出，意味着年費US$99嘅MobileMe服務將逐步引退。iCloud會提供5GB儲存空間，基本上聯絡人清單、行事曆、音樂、Apps同電子書都可上載到此，當中嘅Documents in the Cloud功能，更可以將Pages、Numbers及Keynote等辦公室文件推送到所有iOS裝置，毋須再人手逐一備份。

另外，好多人喜歡用iPhone聽歌睇相，可惜容量有限，經常要刪刪減減，因此iCloud亦加入不少對應嘅功能，例如用戶只要用iPhone影完相後同步至Photo Stream雲端相簿，就能讓所有iOS裝置、Apple TV、OS X甚至Windows PC自由存取，而且每張相都會有30日存放時間，更不佔用原來嘅5GB儲存上限。而iTunes in the Cloud服務則容許用戶下載音樂後，再自動同步到最多10部裝置上，當中所有歌曲都會採用256kbps AAC編碼，保證音色有一定水準。

iOS 5 強化影相提示功能

跟iCloud同期推出的還有iOS 5，比起iOS 4，新版本合共提供了1,500個新API及200個新功能，包括位於屏幕頂的Notification Center提示頁，它能綜合管理所有SMS、未接來電及程式通知，唔似舊iOS般咁散亂；iMessage則向Whatsapp偷師，容許所有iOS裝置透過3G或Wi-Fi免費互傳訊息、聯絡資訊、相片甚至影片，兼設有歷史紀錄，睇嚟傳統SMS服務好快會玩完。另外，舊iOS嘅備忘錄亦升級成Reminders，除可設定工作嘅優先次序、到期日外，更對應GPS定位服務，例如到達指定地點後會收到提示訊息，最啱大頭蝦使用！

影相功能亦作出強化，好似追加AF/AE鎖焦、去除紅眼等，但最驚喜的還是鎖機時會有拍攝Shortcut，點一點就跳到影相模式，並可把音量鍵當作快門；新版Safari又可改變網頁字體大小，及加入分頁顯示；而全新的PC Free則可讓用戶買機後，直接激活並設定iOS裝置，機內的資料更可經Wi-Fi同步到iTunes資料庫，徹底飛走電腦。

Lion 7月現身App Store

iOS以外，Mac OS X亦迎來第8個重點更新，代號為Lion的新版本設有250個全新功能，例如MacBook會有全新的Multi-Touch動作；支援全屏幕應用程式；將Expose強化的Mission Control；提供對話功能、時間軸的新Mail；以及容許Mac機自動建立點對點連線的AirDrop等。

此外，Lion還提供自動儲存功能，以及可隨時回到先前工作狀態的Resume介面，而Photo Booth亦終於支援臉部追蹤，並提供更多有趣特效。值得一提的是，Lion今年7月推出時不會再以光碟或USB形式發售，而是通過Mac App Store讓用戶單撈，總容量為4GB，建議零售價則為US$29.99，今年6月6日或以後買機的用戶更可免費更新。

One More Thing...... iTunes Match!

每年Keynote尾聲教主都會講句「One More Thing......」，然後介紹重量級產品，不過今年只係得iTunes Match服務，認真失望。它有點像本地的KKBOX，會掃描用戶iOS內的所有歌曲，然後與iTunes Store內逾1,800萬首歌進行比對，若成功配對就會升級至256kbps AAC無DRM版本代替，年費為US$24.99，今年秋季起推出。