為EVA 破戒做宅男
筆者從未玩過Figma可動人形系列，恐防一旦沉迷，會被女友叫宅男。不過剛剛推出嘅Figma綾波麗，配埋零號機改嘅駕駛艙，連操縱桿都扭得郁，人物造型參照「EVA 2.0」《新劇場版：破》，唔再Sell「萌」樣咁齋。同步上架嘅山口式零號機改，都係新劇場版造型，重現「托彈天王」大戰第10使徒嘅英姿。兩款都咁吸引，就算畀人嗌宅男都要買！
Figma綾波麗 有艙相伴
N年前電視版嘅綾波麗不苟言笑，表情Cool到暈，到咗《新劇場版：破》，終於見番啲微笑場面，今次Figma就做咗款「女神的微笑」嘅害羞面容。另外，多得新素體關節進化，隱藏咗膊頭Ball Joint，亦改善埋頭部及胸部嘅轉動幅度，擺甫士易得多。不過最有Gimmick都係華麗嘅駕駛艙，金屬銀色外殼夠Cyber，而且操縱搖桿有三組可動關節，連帶腳位都可以向左右撐開，配合埋專用台座，擺個出擊Look絕無難度。
山口式零號機改 托彈怒插
至於山口式嘅EVA零號機改，亦都用咗劇場版造型，雙腕跟右邊大髀都整成繃帶Look，隨盒亦有Parts換番做正常狀態。至於任屈都得嘅蛇腰豈可從缺，紅眼睛亦做得晶瑩剔透，正！至於Gimmick位就係大玩N2航空誘導飛彈，送埋第10使徒嘅核心特效部件，重現劇中雙手托彈怒插使徒一幕，可惜肩甲線條、細節做得馬虎，仲有上色鬆散嘅問題，希望隨後推出嘅山口式EVA可以改善啦！
查詢：2148 9483（精品）
前：Figma No.091-綾波麗$288
後：山口式No.104-EVA EVO Series零號機改$268
駕駛艙嘅錶板、操縱桿一應俱全，把手及腳踏都有可動設計。
除咗識笑，亦有認真Look嘅面容，重現綾波麗駕駛零號機保護碇真嗣嘅場面。
唔只有微笑Look，隨盒仲有劇中被碇真嗣拋棄嘅「S-DAT」舊式Walkman。
配件唔算多，不過有專屬插座放置手掌配件，唔怕整唔見。
新素體隱藏咗膊頭嘅礙眼Ball Joint，戰鬥服又上色精細，Like！
N2航空誘導飛彈嘅長度足足有零號機咁高，落足料。
面相上色只算一般，好彩眼位選材唔錯，透光度高。
手抱飛彈會令EVA企唔穩，一定要用埋踏地組件支撐。
加埋第10使徒特效部件，就重現到大飛彈怒插使徒一幕。