apt-X藍芽傳輸 靚聲唔使駁

對音色有要求嘅朋友，屋企點都會整番一對大喇叭甚至5.1聲道音響；雖然音色夠晒靚，可惜駁線複雜，器材擺位以至聽歌位置都有所局限。Creative新推出的一系列音響組合，就融入藍芽技術，可以配對大部分的藍芽設備及裝置，聽歌從此唔使再受束縛！

Dx系列喇叭 靈活組合

唔少多聲道音響都會有特定的組合，用家想進行升級的話，極可能要整個系統更換，成本高昂。Creative新出的喇叭組合自由度就高好多，全新的ZiiSound Dx系列分別有D3x、D5x兩款可以獨立使用的藍芽喇叭，以及DSx藍芽低音喇叭，最特別之處是用家可以隨喜好新增無線喇叭的數目，最多可以增至3部D5x喇叭，分別負責左、中、右聲道，加上一個負責低音的DSx低音喇叭，即可構建出3.1聲道的音響系統，靈活性高。

快A2DP一倍 媲美駁線

普通的藍芽傳輸都是以A2DP制式進行，傳送音樂時難免會有失真，所以Dx系列特別採用了apt-X音效技術來提升無線音效的傳送質素。用家只要將特製的藍芽傳輸插件插進iPhone底部，即能使用apt-X技術來傳送音效，舊有的A2DP傳輸量只有700kbps，而apt-X則提升至1.4Mbps，足足大了一倍。現場以D5x進行測試，高低音的效果都相當突出，音色更十分接近有線機款，加上藍芽無線傳輸穩定冇窒，以後喺屋企任何位置都可以焚機。

D80 輕裝色誘

如果嫌Dx系列太大部的話，仲可以考慮另一款機仔細細的D80，同a樣支援藍芽傳輸，最啱用嚟接駁iPhone 4、Android手機等內置喇叭表現一般嘅藍芽裝置，而且D80備有粉紅、淺藍、綠等搶眼顏色，充滿夏日氣色，拎去沙灘或者去Camp，絕對一流。

M300 變種Nano

出開MP3機嘅Creative，同場亦推出全新的M300，外形與新一代iPod nano極為相似，備有1.45吋屏幕以及輕觸式按鍵，最重要是支援最大32GB mircoSD記憶卡，換言之唔使透過專用程式就能將歌曲抄入機內，方便到極。加上備有藍芽2.1，可以無線連接前述的D80、D5x等多款喇叭，幾時都可以焚機聽歌！