iPhone出氣袋 發洩怨忿
近期通脹嚴重，唔單止食材、日用品係咁加價，連巴士、鐵路收費都有增無減，絕對令一眾打工仔百上加斤，如果開工時又撞着麻煩上司或者無品同事，真係唔扯火就假。想心情變靚啲，不妨去AppStore單撈各種出氣Apps，拳打老闆又得，成個釘書機兜頭飛埋去同事度亦得，保證大家玩完怨氣全消！
《Punch Boss》盡情打上司
返工少不免會遇到受氣事情，唔想谷到一肚火，就一定要玩《Punch Boss》。遊戲中，玩家可以不理身份、地位、前途，盡情向呢位虛擬上司拳打腳踢。大家可以選擇兜巴星或者使出昇龍拳打到佢口腫面腫，自然一身都鬆晒啦！美中不足的是不設更換頭像功能，否則會玩得更投入。
費用：US$0.99
《Office Jerk》亂掟文具
唔少打工仔由朝到晚都要坐在辦公室，容易跟同事產生磨擦，今次玩家對面就坐了一位面目猙獰的四眼同事，佢仲會不時擰轉面藐你，呢個時候，各位可以隨意拎起枱面上的文具，毫不留情咁掟向對方，直至佢暈低為止。但難就難在大家要不時留意風扇的擺向，以免影響投擲角度，難度甚高。
費用：免費
《DoogiPang》怒扑傻瓜
以前有不少遊樂場都會提供「扑傻瓜」遊戲，大家手持大錘扑向彈起的怪物，刺激好玩，DoogiPang就將「扑傻瓜」遊戲移植到iPhone。畫面設有3×3共9個洞穴，造型趣致的地鼠會從洞穴隨機彈起，扑中愈多，分數愈高，而且可以趁圖案尚未完全消失時，狂扑賺取Combo，令遊戲更緊湊。
費用：免費
《Boxing Fighter》拳拳到肉
近年很多朋友都會學打拳來發洩情緒，不過對於初學者而言，確實難上手兼且容易受傷，倒不如試玩呢款《Boxing Fighter》。玩家要與一眾拳手競賽，如果玩Career模式，更可以自創角色，拳套、戰靴以至髮型、樣貌都可以任意設定，贏出比賽後就能儲分買新招，隨時打餐飽！
費用：US$0.99
《Street Cat Fighter》貓仔格鬥
《街霸》是經典的格鬥遊戲，招式多變得來又緊張刺激，雖然今次遊戲名稱跟《街霸》只是一字之差，不過畫面、風格截然不同。遊戲用上可愛的貓仔作為主角，不過牠們隻隻好勇鬥狠，打起上嚟都唔係人咁品，但勝在攻擊時不需要Chok招，只要用手指篤或Drag即可，女仔都識玩！
費用：US$0.99
