on.cc 東方互動主頁

首部DoCoMo冇Sim Lock 極速上網

有人說：「靚嘅女人特別麻煩」，同樣情況亦可以形容日系手機，唔係咩？雖然樣靚芒正，但又要解鎖又有圈外問題，煩到死！然而，自從今年4月起DoCoMo取消SIM Lock後，今天日系機就再冇上述問題。日前首部免解鎖機王SH-12C便經水路到港，實測下任何SIM卡都用到，而且內置孖鏡可拍3D立體片，規格咁強都只係賣五千幾元，今次行貨Android機有勁敵了！

日本電訊市場不如香港般百花齊放，多年來都是由DoCoMo及SoftBank分庭抗禮，但自從後者取得iPhone獨家經營權後，DoCoMo在智能手機市場便節節敗退。為迫使對手開放iPhone，DoCoMo宣布從今年4月1日起，取消旗下手機嘅SIM Lock限制，容許用戶自由換SIM，以前賣出嘅手機，亦可用¥3,150到當地門市解鎖，而今次呢部SH-12C，正正係政策下首部流入嘅水貨瀛Phone。

告別圈外問題

以前玩日系機，先要解鎖，方法不離兩個︰一係軟解，但成功個案不多；一係用Hyper SIM硬解，透過電路版「欺騙」手機以為運行的是日本SIM卡。然而，無論使用邊個方法都好，最終都唔可以經本地電訊網絡上網，間中仲會死機，要拿回舖頭維修。SH-12C最大賣點是先天不設SIM Lock，毋須解鎖，亦冇圈外問題。實測所見，佢不但認到3香港SIM卡，而且短訊、聽歌等分唇都用得番晒，最重要係設定好APN後就能經3.5G上網，以後上網毋須再周街搵Hotspot，感動！另外，以前解鎖後睇中文會間中出現「怪獸」字，但如今就直讀冇誤，若嫌五十音輸入法難用的話，用戶更可經Android Market自行安裝中文輸入法，入中文同行貨機一樣咁方便！

激凸裸眼拍片

冇SIM Lock已經夠吸引，估唔到 SH-12C硬件一樣引死人！佢冇跟風玩雙核心，但處理器速度就高達1.4GHz，莫講話上網打機勁流暢，Benchmark分數更高過好多同級智能有手機。屏幕方面，採用了Sharp研發嘅New Mobile ASV，出名色準、鮮艷、低功耗，而且4.2吋芒解像度剛好為qHD，睇16：9影片唔會有黑邊。至於鏡頭方面，Sharp早喺003SH玩過裸眼3D拍攝，但今次更進一步，鏡頭數目由一組加至兩組，用戶唔使手動將鏡頭由左移到右；只要按下快門，孖鏡自會拍攝兩邊影像，然後重疊起來，再輸出成720p立體短片。正面睇，畫面真係好似飛出嚟一樣，有晒前後景深，而為免用戶睇得耐會頭暈，手機更提供立體度調校功能，想幾凸有幾凸！

微調智能介面

日本人開始接納Smartphone， SH-12C就預載咗Android 2.3系統，而首頁、程式頁更可切換成3D顯示，Icon浮起晒，用落比平面Android過癮好多。另外，佢亦對使用的系統加入不少微調，例如首頁可加至10版、程式頁可更改名稱，而通知頁又能管理埋畫面方向及microSD卡等等，操作比公版Android方便同全面好多。貴為3D手機，立體內容自然唔少得，好似有魚樂無窮立體版《3D SAKANA+》，又有4段立體MV畀大家睇個夠。睇厭咗，更可直駁Sharp官方特賣場GALAPAGOS SQUARE下載3D影片同遊戲，呢點未解鎖前一定做唔到！當然有讚就有彈，此機通話時間僅得310分鐘，而且3D功能勁食電，小記叉爆後玩一陣就冇咗幾格電，煲粥難免要就住就住！