致敬•行善HT 1/6 Superman

近年美漫改編電影一部接一部，但嚟嚟去去都係Marvel英雄，DC就只有Batman同綠燈俠，氣勢相差好遠，好彩DC仲有鎮書之寶超人喺度，呢個身穿紅色斗篷、底褲外穿嘅大隻佬，形象深入民心，演員基斯杜化李夫（Christopher Reeve）更叫人無限唏噓……多次向經典角色致敬嘅Hot Toys，最近炮製咗1/6基斯杜化版超人，讓大家回憶無限美。

無人不識嘅超人，當然有唔少單位打佢主意，單係Figure就有好多個版本，例如DC Direct、HT及Medicom等，HT就曾經為《Superman Returns》推出過1/6 Figure，奈何演員班頓洛夫（Brndon Routh）實在基味太濃，所以回響唔大。等咗咁多年，民望更高嘅基斯杜化版超人終於登場，HT道出原委︰「好耐之前我哋已經想做呢款超人，不過近年華納先肯批出版權。為求盡善盡美，呢半年不斷改良，直至近日先算滿意，可以正式公開。」HT仲話今次嘅部分收益會撥捐基斯杜化嘅慈善基金，延續超人助人嘅正義精神。

最強班底發功

講番Figure本身，集合咗HT嘅最強班底，例如由Arnie Kim雕頭、JC.Hong塗裝、Joseph Tsang做Body，最後由Yulli做美術監修，當中Arnie更係李小龍以外，罕有為外國明星雕頭。從首辦看，人物輪廓、膚色都相當逼真，眼神亦見神髓，遺憾係軟膠頭髮始終有啲假，雙眼亦非P.E.R.S.系統，HT為此解畫︰「我哋原先都想過加入轉眼系統，不過製作時發覺效果一般，幾經取捨後，都係用番慣常嘅藍眼珠效果最好！」據知頭雕製作後寄畀電影公司審批，結果一剔過Pass，就知完成度有幾高。

勁大隻新Body

基斯杜化飾演嘅超人身材Fit爆，Figure自然唔可以弱雞，HT就專登炮製咗一款全新Body，比狼人Body仲大隻，缺點係只有胸位包膠，大腿亦粗咗啲，線條感有待改善。服裝方面，緊身衣採用彈性物料製成，大動作甫士都唔易爆胎，而且斗篷內藏鐵線，方便大家扭曲成瀟灑形態。

配件方面，以價錢論數量係少咗啲，只有6隻可換手及一個仿水晶地台，VIP會員就可獲贈氦氣石一塊，比例同質感都跟足電影。講句公道說話，超人無論喺漫畫原著、動畫或者真人電影版，向來都係赤手空拳救地球，你幾時見過佢舞刀弄劍？所以配件數目並非重點，Figure做工先係最重要。順帶一提，可能有粉絲會抱觀望態度，諗住遲啲會有西裝版嘅超人推出，HT就表明短期內都冇咁嘅打算，超人粉絲無謂白等喇！

＊圖中為試辦款式，與正式推出的版本或有少許分別。

查詢︰2388 4677（玩具狂熱）