《Dead or Alive Dimensions》3D靚女換衫肉搏
任天堂嘅3DS連專用3D遊戲可謂有點生不逢時，一推出無耐就遇上日本地震，好多一早排好期的遊戲都要延期推出，格鬥Game《Dead of Alive Dimensions》就係其一。雖然《DOA》之父(土反)垣伴信已經離隊，但新作集以往遊戲系列的大成，一班性感的3D靚女埋身肉搏，換上a立體顯示後，自然更有睇頭！
篤芒出絕招
跟首輪登陸3DS的另一款王牌格鬥遊戲《Super Street Fighter IV 3D Edition》相似，《DOA Dimensions》可利用下方屏幕提示點樣出招，唔使對住說明書慢慢學，而且同樣能夠直接在下方屏幕一篤出招，啱晒功力未夠嘅初哥。但對於打慣格鬥遊戲的忠實機迷，開發小組Team Ninja都特別在遊戲中加入Chronicle模式，有埋故事畀玩家重溫劇情章節，再慢慢完成各種絕技教學，當中都有唔少章節更係完全未見過，唔係照抄舊作咁冇誠意。
舊角色新場景
至於角色方面都係見慣見熟嗰幾位，人氣最高的兩位女角Kasumi（霞）跟Ayane（綾音）都有份參戰，男角則有神速忍者Hayate（疾風）同霧幻天神流的繼承人Raidou（雷道）。角色面熟，但場景就玩啲新意，除加入詭異的深山同開滿櫻花的京都外，亦用埋Wii遊戲《Metroid Other M》的場景，忠實Fans玩落都會覺得有新鮮感。另外，《DOA Dimensions》無論在Internet Play或者Local Play上，都一樣支援到雙人對戰；在對打之餘亦設有二人協力，以Tag Mode輪換模式一齊對付敵人。
每日下載新衫
《DOA Dimensions》今集仲加入咗一個有趣嘅自動連線下載系統，分兩個階段每日送出一套主角靚衫，可能見遊戲延遲咗成兩個月先推出，所以靚衫數目亦由原本的28套加碼到34套，首輪自5月19日開始送到6月21日，第二輪則會由6月23日送到7月26日，依家買Game一樣有得為女角換靚衫。雖然衫款都幾多，不過從目前公開嘅資料嚟睇，設計似乎太過保守，Show唔到《DOA》女角的身材特點，希望日後設計會大膽啲啦！
info
類型：3D格鬥
開發：Team Ninja／Koei Temco Games
平台：Nintendo 3DS
售價：約$400
查詢：2359 7998
一樣可以打爆場景內的擺設，算做得好仔細。
設有十多個不同風格的場景，部分更是全新設計，玩落有新鮮感。
中國組男女混戰，睇畫面似乎係太極拳暫時險勝截拳道。
同樣都是過場動畫，唔使用裸視屏幕都睇得出畫面富立體感。
Cut Scene都做得幾有睇頭，唔好錯過。
在櫻花下的京都對戰，別有一番風味。
《DOA Dimensions》延遲咗成兩個月先推出，所以就加送咗34套主角新衫畀玩家下載補數。
遊戲的視覺效果都做得幾出色。
透過新的自動連線下載功能，每日都可下載一件新衫，不過款式都幾保守。