第50屆靜岡模型展 拉打高達鬥威
雖然地震打擊沉重，好在日本人泰山崩於面前而色不變，早前圓滿舉行嘅模型界盛事—第50屆靜岡模型展（50th Shizuoka Hobby Show），各參展商施展渾身解數，熱鬧依然，Bandai更一改高達獨大嘅傳統作風，以拉打家族中最德高望重嘅「新一號」領軍，加入MGF（Master Grade Figure）模型系列，睇怕其他嘅昭和拉打都會排隊等住上，資深拉打迷要儲定銀彈等入貨了！
昭和拉打 新一號打頭陣
近兩、三年嘅拉打玩具，都係以平成角色為主，令昭和時期嘅粉絲望穿秋水，今年Bandai終於打破悶局，決定喺MGF推出元祖級嘅新一號！現場所見，吸取之前幾款MGF W嘅經驗，新一號嘅分件更加細緻，關節嘅活動幅度亦更高，甚至超越身價約兩萬日圓嘅12吋Action Figure，更驚喜係少咗貼紙位，腰帶仲係透明件內嵌扇葉，唔似同系W用貼紙了事。同場仲Show埋舊一號及新二號嘅試辦，雖然仲係「參考作品」階段，不過相信量產機會相當高，睇怕強人、阿瑪遜等昭和拉打都走唔甩啩！
Ka版《W》五子 今年大團圓
拉打咁威，高達都唔示弱，Ka版《W》五子已經出咗飛翼、死神及神龍，剩返重炮手跟沙多洛，兩者嘅試版終於曝光，好大機會喺今年推出，造型藍本源自OVA《Endless Waltz》，顏色較清新簡潔，配合大量Ka版獨有嘅機身標誌。同場仲預先Show埋六月發售嘅惡魔高達完成品，蛇形電鞭加龍頭腳掌，扭曲度大又自然，背包雙翼亦有類似連動設計，與舊模嘅肥仔Look判若兩人。
《UC》再發功 Delta Plus完全變形
除咗主角機，《UC》仲有大量機體排隊MG化，舊年出過1/144嘅HGUC版Delta Plus，今年夏天終於輪到佢升呢。現場特登擺咗一部變形中嘅試辦，以實物證明今次係完全變形，採用類似MG Z Gundam 2.0嘅設計，並非HGUC換件扮變形，要求高嘅模型粉絲可以放心啦！
MG OO出鞘 大大把揸得穩
呢幾日就會抵港嘅MG高達OO+Raiser套裝，同惡魔高達一樣喺模型展提早現真身，作為TV版第二季剎拿嘅主角機，火力當然唔弱，而且戰機O Raiser亦做到分離合體，機體亦加入唔少新製作技術，例如能夠輕鬆又穩固咁舉起大大把SN Sword嘅鎖定關節等，仲有LED發光頭部，詳細情報留意隨後嘅製作報道。
試辦打孖上 RG Strike有後着
上周筆者都提過，RG版突擊高達一定會「橫向」發展，大有機會「一雞多味」，出埋巨劍型、炮擊型及嫣紅突擊等衍生型號，今次去到靜岡，筆者更相信多數冇估錯，事關會場真係Show咗RG巨劍型及炮擊型嘅試辦，落實推出嘅話，會係分開兩盒出，定係只出換裝組件，再加埋空中霸王做升級Boxset呢？還待廠方稍後公布。
前進號 人齊起飛
聽會場人員解釋，《One Piece》艦隻模型出埋呢款有翼嘅前進號之後，就會收山唔再出新款，作為系列告別作，當然係完成度最高，附送嘅人形公仔亦最齊全。不過賣成五千幾日圓，好似貴咗啲喎！冇所謂啦，都最後一隻，唔爭在啦！
MGF 1/8幪面超人新一號
售 價：3,800日圓
推出日期：今年8月
MGF 1/8幪面超人舊一號
推出日期及售價未定
MGF 1/8幪面超人新二號
推出日期及售價待定
腰帶中央用透明件內嵌扇葉，希望量產時兩邊嘅紅寶石都係分件製作，唔係貼紙了事！
半透明嘅複眼夠晒立體，精細度同12吋Figure有得比。
主體肌肉分三節合併而成，拗腰動作分外自然。
Bandai展區有大大塊燈箱廣告板，宣傳最新推出嘅RG突擊高達，以及即將推出嘅量產型渣古。
適逢今年係戰艦模型「Waterline Series」推出40周年，會場就準備咗艦隊大閱兵。
北翼模型展區參展商眾多，比南翼機動展區更熱鬧。
呢個疑似1/1渣古頭唔只夠大個，仲做埋戰損、舊化，唔知Bandai肯唔肯賣呢？
MG 1/100 Gundam Epyon EW Version
售 價：4,800日圓
推出日期：今年6月
摺起雙腳變成雙頭龍，腳掌嘅龍頭更有開合鋸齒，夠仔細！
MG 1/100 Gundam SandRock EW Version
預計2011年內發售 售價未定
MG 1/100 Gundam Heavy Arms EW Version
推出日期及售價未定
MG 1/100 Delta Plus
售價：4,500日圓
推出日期：今年8月
實物為證，MG Delta Plus做到完全變形，比同屬《UC》嘅變形機體ReZel複雜得多，就連模型大師川口克己都向筆者熱烈推介。
模型大師川口克己
MG 1/100 Gundam OO+Raiser
售 價：6,500日圓
推出日期：本月底
雖然只係《電擊Hobby》嘅製作範例，不過睇怕量產化之日已不遠矣。
空中霸王如果連埋換裝Parts一盒過推出，實乃《Gundam Seed》粉絲之福音。
前進號 空島仕樣
售 價：5,250日圓
推出日期：今年7月
附送嘅細細粒路飛海賊團，終於可以Full Team上陣。
Yamato展出今年六月發售嘅Macross 7主角巴沙拿座機，比例1/60。
SkyTree係日本嘅新地標，所以Babdai專誠推出情景模型，不日發售。
模型唔只有高達、拉打，日本人仲好鍾意玩城堡模型，呢款紙製嘅姬路城就靚到O嘴。
除咗模型，現場仲有新款氣槍預展，包括呢款電玩《Bio Hazard》主角Leon專用嘅M92F。
Tomy Takara首次推出模型版變形金剛，仲係已上色嘅半完成品，雖然唔識變形，不過論Chok樣及可動性，都係芸芸變形金剛商品中最高嘅。