全家開餐 畫出假日歡樂
周末難得大人小朋友都放假，當然想一家人出去食個靚晏。但大家有否遇過一個情況：到酒樓飲茶，小朋友呻悶；陪佢哋食快餐店，大人又唔啱胃口。顧得大唔就得細，點算好？相信Grand Central Bar & Grill推出的假日Brunch可以幫到你，店內有大人餐同兒童餐任你揀，周六可以一齊玩即興繪畫，一家大細樂繽Fun！
餐廳推出的假日早午餐名為「繽紛家庭聚餐樂」，大廚說這是個家庭式的Brunch，目標固然是一家大細歡聚一個一午：「通常星期六、日，家長都會諗吓可以帶小朋友到邊度玩，如果有個地方，讓大人細路享受食物之餘，又有得玩，咁就Perfect喇！」大廚話，大人的Brunch選擇共有7款，包括GC全日早餐、牛扒及蛋、班尼迪蛋、黑松露炒蛋，特色奄列、梳乎厘蛋奄列等，大都是香港人愛吃的蛋菜，食材以蛋或番茄為主，輕盈健康。至於兒童餐同樣有7款選擇，都是他們愛吃的食物，像漢堡包、薯條、蒜蓉包、炸魚粒、雪糕……睇見都興奮，小朋友一定肯坐定定乖乖食晏！
周六即興 填色繪畫
供應美食之餘，每逢周六，餐廳都會在Brunch時段內，進行即興繪畫這親子活動。負責人說，餐廳老闆本身在法國藍帶學校畢業，對飲食有一定研究，他同時有修讀藝術，故希望將兩者結合，帶給食客非一般的飲食體驗。餐廳會將二樓用餐區一隅闢作繪畫區，讓食客一邊歎Brunch，一邊發掘潛藏的繪畫天分，據活動顧問Leona指出，即興繪畫，能讓小朋友發揮自己的創意，在不需要任何繪畫技巧、毫無壓力的情況下，與其他小朋友一同天馬行空一番，更能建立他們的自信心。而除了周六外，餐廳在其他日子亦會安排蠟筆和填色遊戲，好讓小朋友們消磨時間，既有美味兒童餐吃，又有即興繪畫或填色遊戲玩，小朋友唔呻悶，大人自可安心歎個Weekend Brunch。
查詢：2736 4888
迷你漢堡包、薯條及沙律 $72
大大個漢堡包吃得多，這款迷你版，勝在的的骰骰夠過癮，不妨擘大個口，一口一個食，爽呀！
周六的即興繪畫活動，成人每位收費$450，小朋友$300，有得食又有得畫，比平時到畫廊更划算。
黑松露炒蛋 $142
用上矜貴黑松露來炒蛋，食落特別滋味，伴以烤鮮蘆筍、薯餅及烘英式鬆餅，其中鬆餅烘過後，十分香脆，襯炒蛋一流。
梳乎厘蛋奄列配雜錦蘑菇 $138
平時食的梳乎厘通常是甜品，但這個梳乎厘蛋卻配上雜錦蘑菇，味道鹹鹹的，同樣鬆化吸引。
餐廳位於平台，落地玻璃窗透進充足光線，很適合一家大小度過悠閒下午。
填色繪畫
GC全日早餐 $148
All Day Breakfast是很多人的至愛，包括兩隻蛋、煙肉、豬肉腸、薯餅、蘑菇、南部特色焗豆及烤番茄，十分豐富。
炸魚粒、薯條及沙律 $72
香口的炸魚粒與薯條是小朋友最愛，沙律則剛好平衡兩者的油膩感。
哈密瓜半個配鮮雜莓 $128
這是外國人常吃的Brunch美食式，因為洋人都愛以新鮮蔬果作正餐，健康之選。
士多啤梨配鮮忌廉 $48
士多啤梨十分香甜，伴以自製鮮忌廉，加上吸引賣相，是小女孩喜愛的甜品。
血色瑪莉 $78
Bloody Mary是餐廳的招牌飲料，用上特別處方，在番茄汁內加入HP汁（一種味道類似喼汁的醬汁），令味道更平衡，綴以用魚湯浸過的大虎蝦，記得食埋佢呀！