iPhone音樂Game 玩到唔停手

早前iOS版《太鼓之達人Plus》現身香港AppStore，就一連幾日榮登Free Apps下載榜榜首，真係幾威水。其實除咗呢套大熱音樂Game外，以iPhone 4現時高解像Retina Display加上靚聲輸出，真係好啱用嚟玩音樂遊戲，小記就精選出以下幾款，包保各位玩到停唔到手！

連線打太鼓《Taiko no Tatsujin Plus》

遊戲由PS玩到手提機，都係靠跟節奏敲打鼓面及鼓邊取分，iOS版《太鼓之達人Plus》亦唔例外。跟NDS版相似，將太鼓放在主畫面，用家要以手指輕觸拍打屏幕。遊戲畫面做到足外，內容都算幾全面，包括設有無線對戰功能，可開定Game Room等朋友挑機。雖然基本程式唔使錢，但好多用家都覺得啲歌賣得幾貴，4至5首一套的歌曲套裝要US$4.99，唔似以前家用或手提版咁，一嚟就有二、三十首歌畀你打。

費用：免費

怪琴彈新歌《Magic Piano》

今期上到iPhone「App of Week」嘅《Magic Piano》，來頭唔細，設計上深受郎朗啟發，遊戲除設有圓形或螺旋形等造型特別的琴鍵外，仲可以好型咁喺黑色畫面上，跟住亮起的光束彈琴。除部分古典樂章可免費下載外，新歌如Lady GaGa嘅《Poker Face》同《Bad Romance》等都要畀錢下載，不過每首唔使US$1，都算抵玩。

費用：免費

3D勁舞團《TO Dance》

《TO Dance》特別在加入一如《勁舞團》的跳舞角色，你有你跟住畫面(扌禁)，角色就會自己隨歌起舞，如果玩得好，角色更會使出超強舞姿。遊戲設有3個3D場景，視覺效果都幾出眾，加上每個場景都有一個隱藏角色，總計可玩到6個角色。

費用：免費

音符考記性《Piano Game Free》

《Piano Game Free》畫面設計得好似廿幾年前任天堂美版灰機的手掣，連帶玩法都一樣以簡單為主。遊戲只有一排琴鍵，要聽住電腦彈出的琴音，再憑記憶按下對應琴鍵，不過係以接龍方式進行，一直玩到大家唔記得正確嘅音符次序為止。玩法雖然簡單，但我Buy囉！

費用：免費

自製挑戰歌《Tap Studio 3》

上App Store一睇，都唔難搵到用「Tap」字行頭的音樂Game，而其中最多人玩嘅就係《Tap Studio 3》，已經有超過300萬個「單撈」。就啱Timing對準Bubble一Tap就得，自製歌曲時更可選擇3條或4條軌道來挑戰自己，並隨時提出及接受挑戰，鬥高分之餘，亦能支援在Game Center上四人同時對戰。

費用：免費

手機版《Guitar Hero》--《Arcade Rocker》

《Guitar Hero》同《Rock Band》系列在家用遊戲機上實屬超班之作，呢款《Arcade Rocker》都好有佢哋嘅影子。玩法上都係就住時間(扌禁)掣，不過呢個App會自動從iPhone Database內，搵出能對應Gameplay的歌曲，最常聽嗰3首更可無限制地免費任玩，唔似其他音樂App咁，玩嚟玩去都係嗰幾首歌。

費用：免費