《El Shaddai》拯救世人冇問題

一間寂寂無聞的遊戲開發商，就是因為《El Shaddai》新作宣傳片中主角一句：「那樣的裝備冇問題嗎？」

而熱爆全日本，更成為網民造句搞Gag題材，仲得到2010年日本潮語的金獎，夠晒話題性，遊戲同時大膽地以鉛筆、水彩、廣告設計等「獨特」的圖像表達方式，起初亦不被市場看好，直到最近入選為「日本Game大賞2011」未來部門的入圍作品，才獲另眼相看！

到底「那樣的遊戲設計冇問題嗎？」小記答你：「大丈夫，冇問題！」

鉛筆畫風冇問題

有時真係要佩服日本人的無限創意，事關為咗令《El Shaddai》的操作介面簡單清晰，同時減少文字訊息出現的干擾，於是就索性清一色融合鉛筆、水彩、廣告設計等多種不同美術風格來繪畫3D場景，抽象獨特，留白地方甚多，跟以往注重細膩CG過場的做法，形成強烈對比。不過玩家同樣受落，因為過去Capcom的《大神》也是有類似的畫風，推出後更好評如潮，而且兩款遊戲都係以「神」做題材，畫面同故事夠晒Match，只係《大神》講的是日本天神，而《El Shaddai》講的是天使。

捉拿天使冇問題

《El Shaddai》故事以舊約《聖經》偽經《以諾書》為題材，講述監視人類的天使Grigori受凡間物欲誘惑而成為墮天使，震怒的天神於是決定以大洪水同時消滅人類跟墮天使。在天界擔任書記官的人類青年主角Enoch得悉後，為了拯救人類免於滅亡，決意捉拿墮天使而展開旅程。遊戲以仿照古埃及壁畫的方式來表達劇情，感覺好似欣賞緊一套神話故事，投入感大增。另外，為了塑造幻想世界的神秘氣氛，遊戲中會有大量過場機關等大家慢慢探索，一邊玩一邊欣賞沿途風光。

(扌禁)掣翻生冇問題

唔想赤手空拳對付墮天使？其實主角Enoch仲可以使用劍弩Arch、圓盤Veil及遠距飛鏢Gale三種武器，不過就要先將敵人打到暈眩狀態，趁佢臨死前發出藍光之時，(扌禁)L1掣奪取武器，但大家要留意武器嘅攻擊力會愈用愈弱，需要定期(扌禁)L1幫佢淨化才能保持強度。相反地，當Enoch快被敵人KO時，連續按鍵就有機會發動「大丈夫，冇問題！」翻生神技，唔使由Check Point再打過。另外，Enoch受到敵人攻擊時也會自動儲氣，當儲到全身着火時，便可發動「Over Boost」增強攻擊力兼使出各式「Boost Skill」，打大佬必備！

INFO

開發：Ignition Entertainment

類型：動作

人數：1人

平台：PS3

售價：$688