《功夫熊貓》體感上身勁打擂台

今年夏天來得早，5月中已經發出酷熱天氣警告，背心、短褲都要提早出動。想身形Fit啲、着衫更好睇，依家匿喺屋企打機都一樣得。嚟緊一個月內，Xbox360平台會有三套各具特色的Kinect遊戲推出，《Child of Eden》玩虛幻、《UFC Personal Trainer》玩硬橋硬馬，以及首度體感上身扮演功夫熊貓打交兼煮麵的《Kung Fu Panda 2》。無論玩邊款遊戲，都可以郁身郁勢全身做運動，一於同豬腩肉講Bye Bye！

重建伊甸《Child of Eden》

《Child of Eden》可說是開拓出另一個體感遊戲領域，暫且可將佢當成體感射擊類別。遊戲故事講述玩家要參與名為「Project Lumi」的計劃，重建伊甸園中人類的記憶，而當計劃接近完成時，卻受到病毒入侵，玩家的任務就是要抵抗病毒侵略，重拾全人類的希望與和平。《Child of Eden》由日本著名遊戲製作人水口哲也開發，捨棄一般遊戲固有的場景，改為在類似太空背景中加入幻想式手法，面對由人類起源、進化、不同物種為題的五彩圖案。玩家要用雙手鎖定及用導彈消滅畫面中出現的病毒，當達成一定條件後，更可舉起雙手使出超必消滅畫面上所有病毒。起初玩可能覺得有啲不知所措，但其實只要放開心情，享受遊戲內一如Screen Saver的五光十色光影變化，以及優美樂章，瞓覺前玩一陣來減壓都唔錯。

光復武林《Kung Fu Panda 2》

電影《Kung Fu Panda 2》將於今個暑假檔期上畫，但遊戲就早一步推出。對比起第一集電影的同名遊戲，當時只係一款用手掣控制的普通動作遊戲，今集就全面改用Kinect體感操作。

拳打腳踢 唔攰易玩

故事都是延續自第一集電影的結尾，功夫熊貓阿波跟孔雀王的決戰，還可連同牠的五位朋友討平狼群、猩猩王同巨蜥蜴等，恢復中原武林的平衡。好玩之處係今次可以落手落腳扮阿波落場打猩猩王，但遊戲設計上都係以一家大細啱玩為目標，所以打鬥場面一啲都唔複雜，採用回合形式進行，當畫面左方或右方出現藍色指示時，就要舉起手進行防禦，防避後則可出拳或出腳攻擊，玩法有趣，亦唔會太攰。

擺檔煮麵 手忙腳亂

當然遊戲內的體感迷你遊戲不止「打擂台」一款咁少，另外還設有攻城戰，玩家要踎低身避過敵人從屋頂飛來的紅色暗箭，還可接住敵人擲下來的石像，再當成武器掟出，好玩又刺激。嫌全部迷你遊戲都係打打殺殺太單調的話，咁新增嘅煮麵迷你遊戲就最啱你，三位客人會坐在前面落單，玩家拎起啱顏色嘅湯碗後，還要雙手如切菜般快速淥麵，然後再將碗麵拋到指定的客人手上，不過筆者就試過幾次煮完麵後，都因為拋唔到畀適當嘅客人而Game Over，所以睇落以為好易，但玩落都有一定難度。故事主線上除了阿波可單打獨鬥外，還可配合Kinect的聲控指令，召喚五位老死前來幫手，相當有趣。

屋企舉鐵《UFC Personal Trainer》

相比起之前同類形的體感鍛煉遊戲，專為健身練大隻而設嘅《UFC Personal Trainer》，對體力要求就高得多，基本上全部內容都是為鍛鍊肌肉而度身設計，好似有鬥快打沙包、Push Up同踎低舉鐵，玩一分鐘已經消耗咗10個卡路里以上，全部硬橋硬馬，唔及同類《Your Shape：Fitness Evolved》咁有趣味性，但唔夠時間去Gym的話，都可以喺屋企慢慢練。

查詢：（a）3071 4868　（b）2418 8896