勁過3D Jack Sparrow立體真身

全球大人細路等到頸都長嘅《魔盜王》第4集《加勒比海盜︰魔盜狂潮》，本周四將正式上畫，今集除咗加入性感女星Penelope Cruz，仲用埋《Avatar》嘅全3D技術拍攝，視覺享受更上一層樓。不過，睇戲都要戴3D眼鏡，Hot Toys最新推出嘅12" Jack Sparrow，就好似Johnny Depp真人跳出大銀幕咁立體逼真；正如HT話齋，呢隻Figure集齊旗下最強頭雕師及造型師炮製，誓叫一眾Depp迷、玩具迷齊齊入「魔」！

當其他Figure廠今年先大鑼大鼓話出Jack Sparrow，HT早喺2007年已修成「魔」道，當年由Yulli負責雕頭，其後因應第二、三集電影，先後製作咗發哥飾演嘅嘯風船長、Elizabeth Swann、Will Turner及八爪魚船長等角色，埋單計數，今次已經係HT第八個《魔盜王》作品，經驗絕對豐富過人！

迪士尼畀足料

老實講，小記唔係老Depp粉絲，但見呢隻Jack Sparrow首辦，腎上腺素都係無可避免攀升，據知HT門市最近多咗宅女出沒，就係為咗呢款新Figure。拍攝當日，筆者第一句即問︰「點解可以似成咁？」美術指導JC.Hong解畫︰「07年第一次造Jack Sparrow，我同Yulli只得一、兩張劇照參考，人物樣貌、戲服都未能完全掌握得到。相反今次迪士尼預先提供咗大量素材，加埋頭雕師Kojun以前就私下雕過多個Jack Sparrow，相輔相成下，今次嘅頭雕自然更加逼真！」

眼球變細更逼真

相比《魔街理髮師》Sweeney Todd嘅青靚白淨，鬍鬚核突、超多頭飾嘅Jack Sparrow理應更難製作，但從實物所見，似乎難HT唔到。首先辮子頭採用類似Predator嘅軟膠製作，比植髮更有層次感，亦更易打理。至於五官、輪廓亦貼近真人，仔細睇嘅話，仲會見到顴骨有微細斑點，JC嘅塗色工夫又上一層樓！而且貴為第六款DX系列作品，雙眼採用P.E.R.S.轉動技術唔出奇，驚喜在於眼球直徑縮細至5mm，令雙眼距離更適中，驟眼睇自然更Human-Being。

可動仿木船舵

老Depp做戲出名多表情，除圖中所見嘅嚴肅樣，正式派貨時仲會送多個微笑Look畀買家，兩者都有P.E.R.S.，只要將面部向下推就換到，不過笑面Look仲等緊老Depp本人親自審批，所以暫時冇面見人。服飾方面亦比舊版改良不少，例如帽、鞋以前用膠製，如今分別改用仿皮及麖皮；另外胸前皮帶有暗花壓紋，佩刀亦由包膠變成合金物料，加上跟足第四集有兩把佩槍，裏裏外外都絕對足料。不得不提仲有地台設計，雖然冇布景板，但有膠製仿木船舵一個，跟足比例製成、夠大件，內裏仲有麻繩兼可轉動，方便大家擺出招牌扭軚甫士。

Cosbaby更齊人

除咗Jack Sparrow，稍後時間HT仲會出埋12"嘅Penelope Cruz，不過靚女未到，Cosbaby先行，全套一共6款，分別有3款阿Jack，至於Angelica、Barbossa及Blackbeard就各有1款，全部係3吋豆丁Q版造型，展現另類魔盜狂潮。