Tablet變畫板 Flyer意想筆到

出開智能手機的HTC，終於推出品牌首部Tablet─HTC Flyer，7吋機身夠的骰，仲加入招牌HTC Sense介面，靚仔又實用，誠意十足！不過最創新的是，Flyer竟然備有電阻式屏幕年代最興的Stylus觸控筆，配合HTC Scribe新技術後，可隨時Jot Notes、畫畫、寫埋Memo，就連睇書Highlight都得，玩法意想「筆」到！

自年初推出Tablet專用的Android 3.0平台後，連Motorola、Samsung、LG等大廠都加入平板世界，可惜Google暫時唔畀玩自家UI，搞到蜂巢機部部一式一樣，熟口熟面；HTC Flyer就用回Android 2.3系統，不過換上全新Sense介面，感覺清新，有力同其他廠商一拚。

Scribe筆控新玩法

除了3DS以及Out爆的PDA手機外，使用觸控筆操作的Gadgets確實絕無僅有。雖然新機Flyer採用7吋電容式屏幕，亦支援Drag & Drop、Multi-Touch等觸控指令，不過仍然加入備有兩個實體鍵的觸控筆，可以於部分程式下啟動繪畫功能，包括記事簿、PDF檔以及電子書等。就以記事簿為例，用家可以於程式內畫畫、手寫記事以至錄音，畫面右下角更設有調色盆，用來調校筆觸、顏色、粗幼，十足「小畫家」，相當好玩；當大家想擦掉繪畫的東西時，則可以(手禁)實筆桿上位置較高的實體鍵，畫筆隨即變成擦膠，操作容易。

而較接近筆尖的實體鍵則具有Highlighter功能，每當大家開啟PDF檔、電子書時，(手禁)實此鍵即可以選取文字，方便大家記下重要資料。值得一提的是，機底特設筆控提示鍵，每逢進入支援輕觸筆的介面，輕觸鍵就會自動亮起提示大家，非常貼心。

HTC Watch串流睇片

玩得Tablet，當然會用來睇片，不過YouTube質素麻麻、自己轉片又麻煩，咁全新的HTC Watch就啱晒大家。HTC Watch其實讓用家在網上購買電影後，再利用串流技術即時播放，免卻單撈的步驟，方便快捷。平時串流睇片難免出現窒格，不過小記以3G網絡試用這個服務，由確認至播放只需十數秒，最重要的是畫面唔窒之餘，影片質素亦相當不俗，快進、回播反應都好快，仲可以透過外加配件經HDMI直出電視，坐梳化睇片一流！不過，HTC Watch服務尚未完全開放，香港地區暫時只得荷里活影片的Trailer，官方表示購片服務會於稍後開放，而且全球通行，如果定價吸引的話，相信很多朋友都樂意一試。

Sense 3.0立體介面

HTC Sense介面向來是HTC手機的招牌作，今次Flyer更採用了全新的Sense 3.0。相比舊有版本，新版加入大量3D效果，相當美觀。最重要是介面特別為Tablet作出優化，Friend Stream及電子郵件介面會隨着機身轉向而分成左右兩欄，左邊顯示主題、右邊則顯示內容，設計更接近桌面版，使用上夠晒人性化。另外，亦一如既往保留了大量自家Widgets，包括書櫃、天氣、相冊等，而且Sense 3.0將主頁數目稍微增加至8版，尚算夠用。至於規格方面，雖然未有採用大路的雙核心處理器，不過時脈則提升至1.5GHz，配合1GB RAM，運行Android 2.3時非常流暢，一邊上網、一邊Multi-Tasking睇片都唔窒，表現理想！

SPEC

制式：GSM四頻、HSPA/WCDMA

作業系統：Android 2.3

處理器：1.5GHz

記憶體：32GB/1GB RAM、支援最高32GB microSD記憶卡

屏幕：7吋、1,024×600解像度

鏡頭：500萬像素自動對焦（後置）、130萬像素（前置）

對外連接：802.11 b/g/n、microUSB、藍芽3.0

體積：195.4×122×13.2 mm

重量：420g

售價：待定（備有Wi-Fi及3G版本）

查詢：3520 1234