生鬼LEGO魔盜王

之前LEGO都Crossover過唔少電影推出遊戲版本，好似《哈利波特》同《星球大戰》系列都獲得好高評價，今次更趁第四集《魔盜王》上畫之前，搶閘推出《LEGO Pirates of the Caribbean》，唔止玩到第四集電影的內容，仲可以一次過玩埋頭三集電影版的經典片段尋找寶藏，場面設計搞笑，加上LEGO人仔角色生鬼，絕對玩得過！

玩齊四集電影故事

《魔盜王4》（Pirates of the Caribben On Stranger Tides）要過多兩個星期先上畫，但LEGO版遊戲《LEGO Pirates of the Caribbean》下星期就會搶先推出，更一次過玩埋頭三集《The Curse of the Black Pearl》、《Dead Man's Chest》同《At World's End》，同之前提及過的其他LEGO電影系列遊戲一樣，都會重現原著中的經典劇情同場面，既保留原來電影中的幽默位外，還加入不少惡搞片段，務求大家玩得開開心心。

知人善任過難關

新遊戲內容由於橫跨四集電影，唔單止故事情節豐富，而且登場角色極多，遊戲可以控制到的LEGO人仔角色更多達70個之多，每個角色的設計都好有特色，連帶每人都有各自的專長同技能。遊戲以動作冒險形式進行，場景設有相當多的機關同謎題，但要破解相關的謎題，就一定要搵到具有該技能的角色，所以有時玩玩吓被難題困住時，未必關大家打機打得渣事，主要係睇能否收集到相關角色。《LEGO Pirates of the Caribbean》耐玩度都相當唔錯，共設有多達20個關卡，無論由角色人仔到遊戲場景，都是由LEGO積木搭建而成，連可互動的機關物件都是由積木砌成，玩落都幾有驚喜。

隨時加入2P幫手

遊戲主線在於扮演海盜Jack Sparrow去各處尋找寶藏，正如之前所講，過程中加入了不少LEGO式笑料，尤其是過場動畫更值得再三回味；不少場景更會搬到由積木砌成的海盜船上，還加入LEGO人仔的刀劍對戰，不過筆者覺得搞笑多於一切，始終都是一套闔家歡遊戲，大人細路都要玩得投入。遊戲方面除了可以單人冒險尋寶外，亦能支援二人協力，而第二名玩家更可以中途加入幫手，亦可以隨時選擇離開，非常有彈性。

類　　型：動作冒險

開　　發：Traveller's Tales

平　　台：Xbox 360

推出日期：5月10日

售　　價：$329

查　　詢：2418 8896