on.cc 東方互動主頁

W899 Dual芒王冚蓋照攞景

手機一個芒唔夠用，整多個囉！講就容易，受尺寸所限，即使加多個芒，都只限1吋或以下的外屏，用來顯示日期、來電或短訊尚可，要操控晒全部分唇，難矣！然而，Samsung就要向難度挑戰，今年初曾於內地推出一部W899，內外屏幕都有成3.3吋，就算冚埋蓋都可照樣聽歌影相，加上罕有地支援GSM/CDMA雙卡雙待，就算水貨到港炒至過萬元，都大把人搶！

近年內地經濟愈來愈好，民眾買手機亦闊綽過人，Samsung就睇中這個市場，特別為豪客們炮製了這部W899，憑雙芒、雙卡加黑金高貴機身，內地標價也曾超過兩萬元人仔。正因為設計破格，所以推出至今未夠兩個月，就已經老翻山寨機不絕；不過今次小記驗明正身，保證呢部由水路抵港嘅係原裝正貨。

業界首部雙芒Android

提起雙芒Android手機，好多人想起KYOCERA部ECHO，但呢部機今個月才啱啱喺美國上市，若然以推出時間計算，Samsung W899先至係業界首部。然而，跟ECHO玩雙芒對摺、兩個芒又能互動操作不同，W899採用的是最傳統的直身揭蓋設計，兩組3.3吋屏幕分別位於機外及機內，兩者都是Touch Screen，功能亦相同，即同樣能夠撥號、上網、睇片及影相；唯一分別是揭蓋後就多了一組數字鍵盤可以使用，撥號更為方便。惟要注意的是，雖然兩個芒都用了出名慳電的Super AMOLED技術，但電池容量僅1,500mAh，用落都幾食電，建議開蓋後把外屏功能鎖上，藉此節省耗電量。

Dual SIM跨網絡待機

除咗Dual芒，W899另一「無雙」設計係玩Dual SIM，未了解前大家或許覺得很普通，但跟山寨機玩雙GSM制式不同，它支援的是GSM/CDMA雙網雙待及雙模雙待，即可以同時使用兩個CDMA網絡號碼，又或者放入一張GSM及一張CDMA SIM卡，讓兩個網絡同時待機。心水清的讀者或許會問，CDMA制式在港並不流行，而且月費超貴，Dual SIM功能豈非得物冇所用？但若要經常往返中港兩地，用戶於內地就可以直接用回內地SIM卡，毋須轉卡或支付漫遊費用，夠晒方便，而且跟好多雙卡雙待機一樣，W899換卡時都需要重新Boot機，而且未能支援HSDPA，因此上網只能靠Wi-Fi，略為不便。

預載大量內地Apps

系統方面，W899採用Android 2.2作業系統，並以1GHz處理器推動自家製的TouchWiZ 3.0介面，因此操作相當流暢明快。此機亦預載了三星輸入法，並提供內地常用的筆劃及拼音輸入，若用不慣的話還可手寫中文，實測後發覺連繁體中文都能夠成功辨認。另外，既為祖國出品，手機自然預載了不少內地Apps，例如《開心網》、《人人網》、《天翼視訊》、《支付寶》及《QQ》等，跟很多內地Android機相似的是，手機改用安卓市場取代Android Market，令到支援的Apps數量大幅減少，猶幸它可經Samsung Apps網上商店作補充，總算為手機增值。