剃天行道HT 12" Sweeney Todd　

Tim Burton配Johnny Depp，就如香港杜琪峯拍住任達華，同樣有金漆招牌效應，就算未睇已經估到拍攝風格，仍然買飛入場！今年呢Pair黃金組合多咗一個新成員Hot Toys，後者以高超技術，將《魔街理髮師》嘅殺人狂魔Sweeney Todd，化身為真人倒模般嘅12" Action Figure，頭雕、服飾、配件都接近藝術品水平，各位Depp迷，銀包準備放血吧！

今年Figure界，大可喚作「Year of Johnny Depp」，單係《魔盜王》，HT同Medicom已經鬧雙胎；早前HT更出過搪膠製、Johnny聲演嘅《Rango》，加埋今次嘅《魔街理髮師》，以及之後幾款尚未公開嘅作品，Depp迷仲唔買到破產？

真人倒模

Fans可能會問，Johnny拍埋拍埋咁多戲，大把角色怪雞、過癮過《魔》片嘅都有，點解唔出《無頭谷》同《朱古力掌門人》？HT就解畫：「《魔》片係Johnny首度開金口嘅歌舞劇，仲憑呢部片做埋金球獎影帝，係代表作之一，而戲中嘅維多利亞時代服飾，製作Figure時亦都好有發揮空間。」然而Medicom之前都出過，珠玉在前，所以今次HT特別花時間喺頭雕上，由Song Hye Hyun落刀、Yulli監修嘅頭雕，似到嚇親人，齋睇相與劇照無異，要雞蛋裏挑骨頭，就係Johnny希望塊面飽滿啲，所以頭雕雙頰不如戲中凹陷。

臉冇血色

《魔》片另一賣點，在於無論燈光、化妝、服裝以及場景，都貫徹Tim Burton嘅黑色美學風格，所以個個演員都面冇血色，HT又點樣還原？「我哋做初辦時，頭雕膚色較接近真人，但係電影公司覺得太有『生氣』，要求白番啲，所以頭雕比過往每一款作品都要白。」從試辦所見，JC.Hong嘅塗色技術依然上乘，令面相白得嚟又不失自然，眼圈黑得嚟又唔會變成熊貓眼，真係超高難度；個人最Buy係頭髮部分，以層層軟膠營造出起伏感，植髮就做唔到呢種層次感，值得畀Like。

血仍未夠

戲中Sweeney可以安心殺人，全靠Mrs. Lovett用360°翻轉飛髮椅毀屍滅迹，估唔到咁大件道具，HT都做埋出嚟，而且膠製嘅「皮椅」，表面竟然滿布真皮咁款嘅裂痕，仿古效果相當逼真。留意椅下嘅齒輪都跟足比例做出嚟，就算只係得個樣、唔轉得，都攞足誠意分！唯一要彈嘅地方，係Figure服飾跟足戲服有成四層，亦都用埋Slim Body減低累贅感，不過爭在冇咗件染血白恤衫，未能做足電影嘅血腥味道。至於其他配件，就有六件唔同造型嘅手掌、剃刀及刀盒，跟埋大大個情景Backdrop，方便玩家影相，論豪華程度，拍得住DX系列，當然價錢亦都同後者睇齊，值得與否就睇你有幾Die Hard喇！

零售價︰$1,480　預訂價︰$1,380　發售日期︰2011年第3季

查詢︰2388 4677（玩具狂熱）