中文介面激凸玩微博
日本九級大地震，各路水貨全線告急，在當地停電停產的骨牌效應下，日系手機都宣布延期發售。幸好，Sharp一早已在中國插旗，還選擇在這個時候發表內地首部裸眼3D手機 ─ SH8158U，毋須墨鏡就睇到激凸效果，加上全中文介面兼玩到微博，功能全面，就算正宗東瀛機都要行埋一邊！
入開日系水貨機的三禾電氣Simon哥話，最新推出的3D手機如003SH及005SH，由於貨源不足兼運送冇期，即使來港亦起碼漲價百分之十，與其讓顧客捱貴貨兼無了期等待，不如率先將003SH的內地版SH8158U引入香港，外形不變但功能就親切好多，哈日族不妨轉會。
飛走墨鏡睇3D
說回3D功能，SH8158U為內地首部裸眼3D手機，所謂「裸眼」，即Naked-Eye顯示技術，顧名思義就是毋須佩戴眼鏡，就能睇到立體效果。然而小記心諗，個芒得3.8吋會有幾激凸呀？但當攞住部真機試玩後，老實講，效果同老任部3DS差不多，正面看Android介面猶如飛出來一樣，雖然從側邊看效果會減弱，但SH8158U勝在視點固定得多，所以玩得耐也不會頭暈眼花。若然不習慣，還可透過屏幕左下角的切換鍵，將3D變回2D，悉隨尊便！
立體射擊遊戲
003SH在日本發售時，曾加入《實況棒球》及《Biohazard》等立體遊戲，如今到了SH8158U，以上遊戲就全部剔走，變成三款內地製作的3D小玩意。一款是《3D SAKANA+》，有點像魚樂無窮，3D魚游來游去，可玩性一般。另一款叫《開心美飾3D》，用戶可先揀餅底，然後加入士多啤梨等食材來粉飾立體小蛋糕，用來氹女友就最啱。最後一款《EDF3D》就勁得多，它是一款第一身射擊遊戲，聲畫效果相當出色，而且中文字幕立體浮現，3DS有對手了！
SPEC
•制式︰GSM三頻、WCDMA
•作業系統︰Android 2.2
•內置屏幕︰3.8吋65,536色ASV，480×800解像度
•鏡頭︰960萬像素CCD
•記憶體︰內置1GB ROM/512MB RAM，支援microSDHC記憶卡（最高32GB）
•對外連接︰藍芽2.1、USB 2.0、7.2Mbps HSDPA、802.11b/g
•通話時間︰380分鐘（GSM）、420分鐘（3G）
•備用時間︰350小時（GSM）、410小時（3G）
•體積︰121×62×12mm
•重量︰約140g
•查詢︰2374 0618
免鎖3G網上暢遊
以往玩日系機限制多多，冇中文輸入，部分仲要有分唇Lock，搞到上不到網，實用性極低。SH8158U就沒有這方面的問題，不但設有全中文介面，睇到兼打到中文；還沒有SIM Lock，無論是3香港還是其他本地SIM卡，都能隨時隨地3G上網，毋須再四圍搵方法解鎖咁淒涼！為針對在內地使用，手機還預載了不少內地Apps，例如《新浪微博》、《人人網》、《掌上百度》及《QQ》等，不過最特別的還要數《夏普福袋》，它是Sharp在內地的軟件商店，讓用家免費下載3D遊戲及相片，將手機分唇無限延伸。
裸眼3D，畫面激凸！
960萬像素鏡頭配LED閃光燈，兼可拍攝720p高清片，勁！
機身扁平，連帶快門掣都變得修長，手感麻麻。
記憶卡插槽設於電池下方，毋須拆電就換到卡。
設定、主頁及返回鍵全設於機面，但搜尋鍵就移到了機側，有別於一般Android機。
提供HDMI介面，可接駁至大電視輸出。
機背設計簡約，並經過鋼琴焗漆處理，零舍高貴！$5,680
《開心美飾3D》讓用戶自製立體蛋糕，同行Model就玩到唔停手。
《EDF3D》立體效果相當出色，但玩得耐小心頭暈啊！
《3D SAKANA+》是魚樂無窮的3D版，純粹Kill Time。
3D相有相當景深，而且可調校立體效果，想幾凸有幾凸！
入到中文，並提供筆劃、注音及手寫三種方式。
影相時只要邊按快門邊向右移，就能拍出立體相。
另有《優酷》程式，上網就睇到內地新聞及電視劇。
預載了《QQ》交友App，方便同內地朋友傾偈。
連《新浪微博》都有，不過就冇3D效果，明星留言不會「彈」出來。