蘇志威帶豚玩盡聖淘沙
有時改變，未必是壞事，仲可能愈變愈好！好像新加坡，自從Marina Bay Sands、聖淘沙名勝世界及環球影城相繼開幕後，已成為不少港人的旅遊新寵，加上現有的海底世界及海豚樂園，如此合家歡的度假勝地，就連蘇志威都帶埋老婆劉小慧和兩個寶貝女來Hea一番。
從新加坡市中心前往聖淘沙，只需15分鐘車程，這個集主題樂園、度假村、自然公園及文化中心於一身的度假地，其海底世界的海豚樂園成為今次蘇家玩樂的第一個目標，兩位蘇家小姐Yumi和Ina充滿期待，雖然在香港曾睇過中華白海豚，不過只能遠觀，今次有得落水跟海豚一齊玩，當然興奮。
與豚同游
這裏的海豚來自印度一帶的太平洋，屬駝背海豚品種，即中華白海豚，又名粉紅海豚。樂園中央有個大水池，海豚早已恭候大駕，一見到我們便立即游出來列隊歡迎，個樣得戚又可愛。大家穿好救生衣後，還要聽訓練員講解，才可以跟海豚玩遊戲，我們跟訓練員學了幾個簡單手勢，然後在岸上做指揮，海豚竟真的吱吱聲唱起歌來，逗得大家樂透了。唱完歌海豚還變身畫家，咬着畫筆在我們拿着的紙上即席揮毫，原來牠們挺有藝術天分呢！
熱完一輪身，終於來到戲肉—Swim with the Dolphins，活潑的海豚在我們身邊游來游去，還不停轉圈，好像跳舞一樣，有時又在人們頭上跳過，濺起水花，真頑皮。最搞鬼是牠們還懂得跟你握手，在訓練員的指示下，更可以扶着牠的背鰭來游水，見蘇家大小姐Yumi攬着豚背在水裏游來游去，逍遙到極。臨離開時，可愛海豚還給大家一個Goodbye Kiss，直把Yumi冧暈了。
影城喪玩
新加坡環球影城是蘇家另一個蒲點， 影城內24個遊樂設施中，有18個更是特別為新加坡設計的獨家遊戲，共分為7個主題區域，包括荷里活、紐約、科幻城市、古埃及迷失世界、遙遠王國及荒失失奇兵等，各有不同特色遊戲，無論大人和細路都盡情喪玩。
在荒失失奇兵世界裏的「朱利安國王沙灘旋轉舞會」，用上戲中角色作旋轉木馬，蘇家二小姐Ina第一時間嚷着要玩，更攬實角色公仔唔放，玩到笑嘻嘻。而大小姐Yumi則最喜歡「木乃伊復仇記」，覺得過山車夠快又會倒後行好過癮，最嚇人是有機械木乃伊戰士突襲，非常刺激！而同場還有另一個全球最高的「太空堡壘雙軌過山車」，但Yumi不敢試，笑說等妹妹大個先一齊玩。
影城內還有全球獨家的史力加「遙遠王國城堡」，區內設有4D影院、驢友鬼馬騷、魔藥旋轉輪，以及為小朋友而設的童話主題小型過山車「噴火龍飛行學校」等，咁多嘢玩，又有未來水世界表演睇，一日真係唔夠玩呢！
Swim with the Dolphins
地 址：80 Siloso Road, Sentosa, Singapore
電 話：（65）6275 0030
節 目 時 段：9:45am及1:30pm
收 費：SG$170（約HK$1,037），已包海底世界入場門票，享用點心及一件T恤，須預約。
網 址：www.underwaterworld.com.sg
新加坡環球影城
開 放 時 間：9:00am-7:00pm （星期一至五）；
9:00am-8:00pm （星期六、日及公眾假期）
１ 日 門 票：星期一至五
成人SG$66（約HK$402）、
小童SG$48（約HK$293）；
星期六、日及特別日子
成人SG$72（約HK$399）、
小童SG$52（約HK$288） 。
前 往 方 法：乘搭東北地鐵線（North-East Line），於港灣站（Harbour Front）下車，再轉乘巴士前往名勝世界。
網 址：www.rwsentosa.com
INFO
簽 證 ： 持BNO或特區護照毋須簽證
機 票 ： 乘香港航空至新加坡，來回經濟客位機票約HK$1,440起。
套 票 ： 港航假期Capella Singapore酒店
3日2夜套票，價錢由HK$4,738起。查詢：2369 8888
交 通 ： 可於新加坡港灣地鐵站，乘以湖濱中心為終點站的巴士往聖淘沙。
貨 幣 ： SG$1約兌HK$6.1
天 氣 ： 4月份氣溫約25℃-33℃
一揮手，海豚便按指示企起身，真聽話。
今年2月重開、全球最高的「太空堡壘雙軌過山車」，睇見都覺刺激。
海豚錫錫面珠，看劉小慧的樣子多冧！
蘇家大小姐Yumi精於泳術，與海豚同游點難倒佢？
你睇阿細（蘇志威）跟海豚同游多輕鬆自在。
自去年環球影城開幕後，新加坡已成為不少港人的闔家度假熱選。
「朱利安國王沙灘旋轉舞會」，最啱一家大細齊齊玩。
企鵝特攻隊大受小朋友歡迎，蘇氏一家也來影張紀念照。
史力加的「遙遠王國城堡」，設有4D影院，可以同史力加一起探險。