22吋巨型薄餅現身！
如果你曾經被人笑係Pizza面，麻煩你去銅鑼灣新開的Slices Pizzeria睇睇，巨型薄餅的直徑可達22吋，有排都未輪到你。深感安慰之餘，仲可以即場買件紐約式薄餅慶祝，餅底略帶煙韌，配料豐富，一啖入口熱辣好味。
邊行邊食夠風味
有冇諗過，可以邊行邊食薄餅？好似「掃街」咁Causal？食店老闆Ricky謂：「紐約有好多這類型的薄餅店，當地係咁大個薄餅o架，最緊要大件、多配料，我啲薄餅跟足當地風格。客人既可以原個買走，亦可以即場買一件堂食，甚至邊行邊食，感覺好Causal。」
店子約有7種口味薄餅，包括Margherita、Sauage and Mushroom及4 Cheese等，還可以學Froyo加配料。小記試過4 Cheese，餅底帶麵粉香，厚度適中，溶掉了的芝士味非常濃郁，好好食。這裏採用超過攝氏300度高溫的火山石爐，幾分鐘就可以焗好薄餅，加上流量快，全日不停新鮮出爐，而且用料不錯，包括美國麵粉、意大利芝士及莎樂美腸等，難怪開業不久已吸引大批學生、OL及住客。
查詢：2895 6633
特設開放式廚房，行過會見到師傅炮製薄餅，再加上香氣四溢，即時要入去買番件！
環境光猛舒服，一入內就見到大薄餅，非常養眼，窗邊有長枱供人立食，另有幾個座位，坐低品嘗亦可。
Slices Pizzeria位於街角，裝修得甚有外國風情，老闆Ricky表示紐約有好多這類型的薄餅店，畀人即場買走食。
4 Cheese $30/件溶掉了的Mozzarella、Blue Cheese、Fortina及Gruyere非常濃郁，配合適中厚度的餅底，充滿麵粉香，小記推介。
Hawaiian $28/件最受小朋友及學生歡迎的口味，菠蘿、火腿配搭經典，還可像Froyo般加配料，每款$5，包括煙肉、薯仔、雅支竹、粟米等。
Spicy Salami $28/件簡簡單單，只有辣莎樂美腸、芝士及番茄，但卻食到食物原味，堂食的話有三角形手柄木碟盛着，幾可愛。