電童凰牙合金版體操王子

小朋友卡通《Gear戰士電童》，雖然曾經喺香港播過，不過人氣同甚麼暴龍、陀螺系列差得遠，好彩咁熱血嘅故事同機體設定，都有鹹魚翻生嘅一日，全因當年PS2大作《機戰MX》有份參戰，大家先真正體驗到電童及凰牙熱血到暈嘅出招動作，亦慢慢培養到一班忠實粉絲。今期SR超合金系列就推出呢對孖寶，唔好睇佢哋冇乜Parts就以為唔好玩，其實關節靈活度堪稱同系之冠，好玩到令玩具迷跌眼鏡！

有成15cm高嘅SR版電童，驟眼睇成個戴咗面罩嘅筋肉人樣，手腳都用車轆造型，塑造大隻佬嘅形象，老實講，單靠外表一定唔係走偶像派路線，反而關節嘅心思構造及襟玩程度，足以令電童問鼎實力派最佳新人獎。

抽屜式關節轉腰屈腳

無論係藍色嘅電童，或者紅色嘅凰牙，機體構造都係大同小異，同樣以車轆營造手腕及小腿嘅肌肉感，最抵讚係腰封與大髀都忠於原著嘅起角造型之餘，為咗解決兩者互相頂住、影響扭動嘅毛病，所以喺腰位同大髀罅加入兩組抽屜式關節，轉動腰部或者屈腳時，就唔怕戟住啦！另外，多得肩甲嘅圓渾設計，簡簡單單裝個Ball Joint，已經有唔錯嘅活動角度，而且腰、膊頭，加埋扣住手腳車轆嘅支架，都由Die Cast製成，擺大動作甫士都企得穩，雙腳跪地，甚至一字馬都Easy Job，直頭係玩具界嘅體操王子！

聖獸配件等魂Shop

原著講述小學生「出雲銀河」駕駛電童，跟被「機械帝國加魯法」控制嘅宿敵凰牙，鬥快收集四散嘅數據獸，而電童一旦同數據獸結成契約，就會化身成專用兵器。雖然電童跟盒已經有「獨角獸」造型嘅螺旋槍；至於凰牙就有「眼鏡蛇」嘅電鞭，但係Bandai使出例牌賺錢大法，將其餘四隻數據獸連同機體充電用嘅戰鬥機，撥入「魂Shop限定版」，而且Fans最愛嘅「超獸王輝刃」，亦未有跟Parts變裝重現，睇嚟廠方再出限定版嘅機會甚大，如果要玩齊成Set，大家就要儲定錢等「擴充版」Parts。

查詢：2433 1828（瑞華行）