日版Buzz足秤超合金
日系玩具出名精細，就連「迪迪尼」都打動得到，除咗批個「拉臣」畀海洋堂出山口式胡迪及巴斯光年可動Figure外，最近仲同Bandai合作，幫巴斯光年出超合金，唔止Parts多多，最驚喜係成隻足料兼墜手，不過一分錢一分貨，開價亦都頗有「分量」，粉絲破財難免！
由美國廠出開嘅《Toy Story》玩具，識出聲兼着燈，甚至入埋電池仲識轉圈，都只不過賣二、三百蚊；不過今次嘅超合金Buzz，冇晒以上Gimmick都叫價逾千元，到底葫蘆內賣咩藥呢？
關節實淨企得穩
依小記愚見，相信呢隻Buzz有一半賣Bandai用料手工，剩番一半分分鐘係畀「迪迪尼」嘅版權費，好彩拎起手冇令人失望。超合金出咗咁多年，相信大部分玩具迷都會同意，近年嚟嘅超合金，已經愈出愈似「超合膠」，全身都唔知有無一、兩成金屬件，不過Buzz就反潮流，基本上除咗背包推進器係膠製，全身連骨架有九成都係金屬Die Cast，所以相當墜手，而且重心設計恰當，就算身形上闊下窄都企得穩，抵讚！加上手、腳關節內藏齒輪，聽到「卡卡聲」就知實淨，膊頭位又有抽屜式關節，輕易將雙手拉出，雙腳亦做到單膝跪地動作，只不過大髀關節同腰股拍得太埋，阻礙扭動之餘，甩油更加避無可避，點解Bandai唔將超合金魂嘅抽屜式髖關節移植落Buzz身上呢？
隨盒送花扮舞王
電影中嘅Buzz表情多多，超合金版本亦都跟咗七款唔同嘅生鬼臉孔，有戚眉戚眼、有型樣、又有笑到Kai咗嘅傻樣，最正係電影第三集大跳西班牙舞個陶醉樣，記住插埋隨盒支玫瑰花，幫佢Chok個拉丁舞王Look！
有讚亦有彈，超合金版Buzz令人有捉到鹿唔識脫角嘅感覺，事關心口嗰幾粒掣，連埋右手嘅Laser發射掣，淨係得個字，LED發光或者發聲功能統統欠奉，背部嘅電池及開關掣都係Dummy，有啲可惜。其實廠方可以考慮犧牲少少上半身嘅Die Cast，改用膠料內藏發聲零件，背包用真嘅3A電池，做到真正Effect，相信會好玩得多。
查詢：2433 1828（瑞華行）
Bandai超合金Buzz Lightyear建議零售價：$1,190
單膝跪地冇難度，不過左手拉盡都掂唔到右手嘅Laser掣，只可以勉強扮發射Look。
太空頭罩冇得拉起，開關只係用換件方式交代。
右腳板底有「ANDY」簽名字樣，跟足原著。
關節易刮花啲油之餘，風琴腰位用偏硬嘅橡膠製成，一旦凹咗都幾難復原。
背脊係有電池位，不過電池只係Dummy，冇電動功能o架！
小型操作Manual唔係得個封面，內文跟足原著，印晒解釋同玩法，令人不禁想起電影中嘅相關場面。
Chok樣七面睇
