李慧玲×關琬潼美食易容師

你想扮靚，可以搵美容師、化妝師、髮型師、美甲師等，換上是一杯飲品、一碟菜式、一件蛋糕想變得更吸引，就要靠食物造型師（Food Stylist）出手。Food Styling是怎樣的一回事？且聽兩位Food Stylist關琬潼（Shadow）、李慧玲（Fanny）怎樣利用天賦的美學觸覺，提升美食色香味。

S=Shadow F=Fanny Q=記者

Q1： 你們覺得Food Styling是甚麼？

Ｓ： 簡單啲講，就係將食物變得色香味俱全。每次做Styling，都會預先問清楚客戶的要求，例如想要傳遞的訊息，跟着從食物、布置方面突出效果，令人一見到就想買或想食。

Ｆ： Food Styling要睇對象，不同客戶有不同要求，好似畀小朋友或大人睇已經係兩回事，如客人想要清新健康的氣氛，我就會用多啲紅、黃及綠的顏色，以及用道具配襯，令食物睇落去好靚。

Q2： 每次做Food Styling的過程係點？要不要親自設計菜式及落廚？

Ｓ： 要帶備工具去做，細細隻工具可以做出細緻效果，例如油掃可以帶出光澤，鉗仔用來夾香草等，每樣都有唔同用途。單睇Food Styling個名會以為淨係同食物有關，其實可以引伸到其他方面，例如我為餅店設計的餅盒、紙袋、卡片等，可以係一種生活品味的延伸。

Ｆ： 之前要同客人傾好點做，想要甚麼效果，例如做甜品，要帶埋工具、枱墊等。好多時都要一手包辦，從設計到煮埋出嚟要全程參與。

Q3： 甚麼食物最難做Styling？會用真食物或假食物做？

Ｓ： 多數會用真食物做Styling，因為感覺會好唔同，即使雪糕會好易溶，都堅持要用真貨。魚最難做，熟咗就唔好睇，惟有唔好煮得太熟。

Ｆ： 我則認為雞是最高難度，雞皮一收縮就唔靚，拍攝前要同攝影師夾好影相時間，亦會預備多幾隻雞。我亦多數會用真食物，假食物影唔出理想效果。

Q4： 做Food Styling的最大樂趣是甚麼？又會有甚麼困難？

Ｓ： 最大樂趣係作品效果好靚，外界反應好好。好怕同無要求的人合作，遇到咁嘅情況，惟有避免下次再合作，盡量揀有相近理念的公司或客戶。

Ｆ： 得到滿足感，例如有人讚賞我的作品。我都好同意Shadow的講法，最驚個客人無要求，令到件事唔靚。

Q5： 要成為Food Stylist有甚麼條件？

Ｓ： 識煮嘢、寫食譜係最基本要求，有Art Sense係好緊要，因為這是天生的，好難後天去學。另外，要對食物欣賞、有熱誠。

Ｆ： 就咁睇Food Styling以為好簡單，其實唔係，唔同响屋企煮餐飯，要有其他配套，令件事變得靚。擁有對美學的觸覺、有熱誠好重要，有心想學不妨睇多啲參考書，搵多啲靈感。

Q6：做了Food Stylist後，對人生帶來了甚麼轉變？

Ｓ： 當時係一邊學一邊做，因為Food Styling個範圍好廣，會牽涉藝術、文化，睇得多做得多，令到個人充實啲，仲將興趣延伸到Life Style，擴闊事業發展，研究埋餐枱布置、家居布置，設計出更多靚嘢，我覺得好開心。

Ｆ： 對自己要求高咗，連帶平時煮的食物都靚啲，食得更加開心。當屋企人、朋友讚賞自己，真係好有滿足感。

後記：要做喜愛的事

眼見不少人每天營營役役，不知為何而忙，小記心裏特別可惜；大抵工作除了賺取生活費，也要從中得到滿足感。當你像Shadow、Fanny般，做着自己喜愛的事，即使忙碌也會充滿快樂、感恩，愈忙愈起勁。

李慧玲Profile

別號：Fanny

年齡：30+

職業：食物造型師、烹飪專欄作者

強項：布藝手作

嗜好：行山、去海灘、逛書店及超市

＊ 計劃推出一本食譜，現正忙於籌備。

近期愛閱讀日本作家村上春樹的《村上朝日堂是如何鍛鍊的》。

收藏品有很多，例如設計漂亮的布、英式茶杯及圍裙等。

關琬潼Profile

別號：Shadow

年齡：30+

職業：生活及食品造型設計師

強項：設計

嗜好：插花、閱讀、旅行

＊ 忙於新開Froyo店Smile的工作，另外亦籌備開設自己的Life Style店，將喜愛的物件公諸同好。

最近很愛看兩本書，分別是許舜英的《購物日記》及鄧小宇的《女人就是女人》。

因喜愛插花而收藏了很多日本花器；也為嗜好而買了很多做手鏈的玻璃珠，布料亦是另一至愛。