赤柱馬坑 狗狗激新靚蒲點
天生鍾意郊遊的狗狗，要找一個風光明媚的好地方伸展筋骨，除各區寵物公園外，依家又多一個隱世好去處。於年初開幕的赤柱馬坑公園，環境寧靜，風光如畫，更可以欣賞到180度Wide Angle赤柱灣美景，今次就等我試玩專員松鼠狗阿Del，帶大家遊山玩水！
赤柱馬坑公園早於今年初落成，公園佔地約5萬平方米，主人們可以一邊與小狗散步，一邊欣賞海岸的大自然景色；園內又設有數個主題小區，約45分鐘就可以行畢全程，算是人狗Keep Fit的郊區新地標！
環迴海風多景點
由赤柱大街沿海邊一路行至美利樓，就看到公園入口。公園設有多個不同主題的小區，整體設計配合天然環境，依山而建，人狗一同享受海風緩緩送爽。沿途有小斜路與樓梯，狗狗可趁機練練腳骨力，好在沿路有不少椅子，主人見我阿Del「伸晒脷」，即刻一齊坐低唞唞！除欣賞到赤柱海岸的風景外，園內展區又會介紹出現的留鳥類，例如大山雀、鵲鴝等，又有蝴蝶及植物品種，遊人可順道認識當地自然生態。當然不少得途經的北帝古廟、千年古井及西環仔石灘，是人狗齊影沙龍照的好地方！
赤柱馬坑公園
開放時間︰7:00am-8:00pm
查 詢︰2813 7963
註︰犬隻入園需戴上狗繩及口罩
無敵大海景！正！
赤柱美利樓旁邊就是公園入口處，出發啦！
赤柱馬坑公園入口就在赤柱美利樓旁邊，椰林樹影好易認。
沿樓梯步行約15分鐘，就可以到山頂觀景台，是欣賞赤柱灣及卜公碼頭風光的好地方！
漫步約10分鐘，便到達建於赤柱灣旁的北帝古廟及千年古井，據聞古廟由張保仔所建，以監視赤柱灣情況咁話。
園內新鋪的木地板相當好走，我的腳枕仔不用與石屎地摩擦。
展板介紹園內鳥、蝶品種，儼如一條教育徑。
小小的歷史展區，介紹赤柱及北帝古廟的來源。