影帝駕到 Odin正氣Look

提起Anthony Hopkins,十居其九諗起《羔羊》電影系列,再唔係就係最新嘅《驅魔殿堂》,《Thor》?仲未上喎!然而,本地Figure廠龍頭Hot Toys就有本事將未上畫嘅電影角色帶到玩家眼前,繼早前嘅主角雷神Thor後,雷神老竇Odin亦接棒登場,頭戴金盔手拎長矛,估唔到扮古裝會咁有型!

演員一Take過 玩家未收貨

早於《沉默的羔羊》年代,已經有Anthony嘅Figure出過,不過受角色所限,唔係着瘋人院束衫,就係拎住利刀滿身鮮血,好鬼變態。今次扮演北歐神話中「眾神之神」嘅Odin,唔只面相改邪歸正,襯埋一身宜古宜今嘅威武盔甲,成個Look正氣晒。

上次製作雷神,由於演員Chris Hemsworth名不經傳,因此頭雕好快得到審批,但Anthony話晒係影帝,今次又有冇咁易先?HT謂︰「今次電影公司畀我哋嘅資料相當充足,由戲服到角色扮相都有據可依,加上佢老人家相當Nice,所以頭雕都係一Take過Pass。」然而,演員滿意,玩家卻未必同意,今次由GOX(Eom Jea Sung)負責嘅頭雕,坦白講跟Anthony 嘅真人有一段距離,例如面形太長、頭髮太過起伏、鬍鬚又太整齊等,期望HT喺收納民意後,出大貨時能作出修正。

仿真金長矛 電鍍夠逼真

雖然Odin係眾神之神,原來佢喺北歐傳說中並冇固定形象,只知盲咗右眼、頭戴金盔、身披金甲、肩披大斗篷……電影公司就以此為藍本創作戲服,Trailer所見真係好鬼型。至於Figure,眼罩、金盔、金甲都以PVC膠製成,再經JC.Hong後期塗色,就算膠料都呈現出金屬質感。另外,跟Thor一樣,Odin都有一套緊身打底衫,呢部分原來用咗滴膠,令表面嘅花紋更加突出。配件方面,可換手掌有七隻,至於牛角金盔及「永恒之槍」梗係唔少得,想戴頭盔,就要先拆開頭髮前端組件,所以唔戴頭盔嘅時候,接駁位難免現形;至於永恒之槍亦叫Gungnir,傳說每次擲擊敵人,都百發百中,呢件Parts經過電鍍處理,驟眼睇似足真金呀!

查詢︰2388 4677(玩具狂熱)

*圖中為試辦款式,與正式推出的版本或有少許分別。

Gilbert

頭盔嘅PVC膠塗色夠晒光澤感,連背面都照顧到,夠細心。

HT 《Thor》 1/6 Odin零售價︰$1,080 預訂價︰$1,050 發售日期︰今年第2季

打底衫用咗滴膠技術,令紋理更突出、更有立體感。

金甲偏向啞色塗裝,配合細緻嘅雕工,質感相當高。

頭雕跟真人有一段距離,期望大貨會改善,留意眼罩係鑲入式設計,冇得拆。

長靴由小腿及腳掌兩件Parts組成,藉此保持足踝嘅靈活度。

素體為重新設計,全身有多達30個關節,任你擺甫士。

附送七隻可換手掌、金盔及長矛,配件數量唔算多。