Chat Room

marcovaldo

睇國際電影節嘅習慣由讀大學時養成，一直都未曾間斷，今年都唔例外，買了近10套門票。早年揀戲會慢慢細讀每套電影的介紹先寄信訂票，但依家非要鬥快不可，揀啱要睇嘅導演（好似今年又有史雲梅耶、挑戰忍耐力的費高夫）、國家同夾啱放工時間就要落手訂票。例如今年好想睇的《布宜諾斯艾利斯．攝氏零度》（多次上電影節都睇唔到），訂票首日下晝已經全場爆滿，唔知要等多幾多年先至睇到！

波仔

除咗聽日開幕嘅花展外，大家唔好忘記月底仲有個七人欖球賽。講真喺咁多種球賽中，欖球我就最少睇，但見到球員們搏晒老命、粗獷嘅衝撞搶攻，都真係馬上熱血沸騰！加上最近見到佢哋嘅宣傳片拍得相當唔錯，贊助商更以自己嘅靚靚空姐跟一班大隻佬欖球員進行鬥智鬥力嘅對決作為故事主題，概念天馬行空又夠搞笑，重點係兩樣嘢都Sell到，咁先堅嘛！

Gilbert

小記都算係半個12吋Figure專家，所以經常有人問我︰「全球四大廠商，究竟邊間最好？」。所謂「全球四大」，即Hot Toys、Enterbay、Medicom同SideShow。個人認為Hot Toys質素最平均，頭雕似，Body同服飾亦不斷進步，唯一問題係「唔憂做」，搞到售前服務愈嚟愈差。Enterbay頭雕最似，特別係金大師年代嘅李小龍，但其他作品就不敢恭維，而且Body經常A字膊，失望！SideShow資源最多，Star Wars同Marvel都有大把角色玩，但因為要分散投資，12吋Figure點都唔及全身像咁靚。至於Medicom就最冇誠意，恃住有幪面超人獨家License，就從來唔花心思，而且價錢係咁加。所以，邊間廠最好我答唔到，邊間最差就一定係Medicom！