《Phantasy Star Portable 2∞》任砌原創任務

近期好Game真係浪接浪，搞到班機迷忙得不可開交！為咗慶祝DC名作《夢幻之星》（Phantasy Star）誕生10周年，世嘉推出手提機作品《Phantasy Star Portable 2 Infinity》，將延續上集半年後嘅「古拉爾太陽系」，故事由新種族18歲「鬥人」流浪少女阿渚做主角，為咗賺取酬勞而到處殺人，而事件嘅開端原來係由接受民間軍事企業「Little Wing」嘅護衞任務開始，故事可謂峰迴路轉。

自組任務拎虛寶

跟一般接任務嘅「芒亨」式遊戲一樣，除咗主線故事外，當然仲有可以同朋友連線玩嘅自由任務啦。今集新加入嘅「無限任務」系統，成為呢隻加強版最煞食之處。事關挑戰自由任務後可以利用得到嘅「Mission Code」嚟製作原創任務，任務組合基本上由關卡、出現怪物同埋大佬三方面組成，而唔同組合所衍生嘅掉寶機率跟種類都唔同，大家可以响「Code Counter」登錄最多100個自創任務，去製造機會拎自己想要嘅寶貴道具。

向名作《PSO》致敬

遊戲本身嘅種族選擇、升呢系統、武器合成同前作一樣，好易上手。不過新一集就加入咗一個勁有懷舊Feel嘅Visual Lobby，即係《PSO》年代連線大廳嘅系統，連咗線嘅玩家可以上大廳傾偈吹水，而且《PSO》時代嘅怪物亦會全部翻生，故事劇情也跟《PSO》有關，所以機齡大少少嘅玩家玩落會覺得分外親切！當然，系列作依然會同其他遊戲和公司做Crossover，例如通過特別任務得到同伴人物「肯德基爺爺」、「初音」裝飾衣服等，非常多嘢玩！

遊戲檔案

名稱：《Phantasy Star Portable 2 Infinity》

平台：PSP

類型：動作

人數：1人

　　　（可連線）

開發：SEGA

日期：已推出

售價：$429

查詢：2710 8825