血獸拖狗　咬住唔放

雖然《鐵血戰士》續作一蟹不如一蟹，不過相關玩具就依然勁好賣，擁躉一路呻窮一路入貨，點解咁傻先？咪因為啲Figure愈出愈正囉！以Hot Toys最新炮製嘅Tracker Predator為例，Body雕工上乘，就連隻血獸獵狗都按比例做埋出嚟，實行落閘放狗，咬住大家嘅荷包唔放！

造狗難過造人

如果話李小龍係Enterbay嘅台柱，咁Predator就喺HT擁有相同地位，唔計半胸像、全身像，單係1/6 Figure已經10隻手指數唔晒。當《Predators》上映之初，HT亦明言會將戲內血獸全部做晒出嚟，頭炮Berserker叫好叫座，其後Falconer亦Keep到銷量；作為埋齋之作嘅Tracker，就多隻獵狗做賣點，令粉絲欲罷不能。

HT造型師Joseph Tsang亦都講明，獵狗係今次嘅製作重點︰「吸收過上兩次經驗，今次做Tracker嘅難度已經唔高，最花時間反而係隻獵狗，因為好難掌握質感，似恐龍又似蜥蝪，為免出錯，落刀前要先預想塗裝效果，搞到製作時間拖長一倍有多。」所謂慢工出細貨，首辦所見，獵狗無論比例、皮膚都好逼真，尤其是背上嘅尖刺，成條骨咁款，用料一啲唔似PVC。或者有玩家彈隻狗唔識郁，不過Joseph話考慮到Ball Joint會影響造型美感，最後取消咗，絕非將貨就價所致。

冇面見人確遺憾

講番血獸，相比起Berserker到Falconer嘅小轉變，Tracker變化就大得多。雖然採用咗同款14吋Body，但面層嘅蜥蜴皮重新上色，手臂、大腿位置都有新盔甲，配合腹部追加嘅皮革繃帶，筆者覺得擔當追蹤者嘅Tracker，係三者中最有型。然而有讚有彈，今次嘅配件實在少得可憐，既冇人類骸骨又冇長矛，數埋竟然只得三對手掌及三把手刀替換，而且鑑於電影中Tracker一直都「冇臉見人」，HT喺冇參考資料下，唔敢亂作面部造型，所以面具冇得除，有啲遺憾囉！

搪膠蜥蜴王

美國西部，有仙人掌、有槍戰，仲有蜥蜴王！由《魔盜王》尊尼特普聲演嘅《Rango》動畫即將上演，HT特別將主角馬拉高化成8吋搪膠公仔。「青咇咇」蜥蜴穿上一身牛仔裝，跟埋皮帶、手槍等配件，爆笑造型跟足電影，將於第二季推出，Depp迷不容錯過。

零售價︰$380

推出日期︰今年第二季

查詢︰2388 4677（玩具狂熱）