重溫經典遊戲iPhone隨時開戰

幾日前，NBA嘅明星賽啱啱完結，快艇嘅格芬就拎咗架跑車出嚟玩飛身入樽，仲贏埋入樽王，技驚四座。小記就冇NBA球員咁好彈跳力，但係安坐家中都可以瘋狂入樽，講緊嘅就係iPhone版《NBA Jam》，得意人物好玩又搞笑！除咗《NBA Jam》外，仲有唔少大廠翻炒家用機舊作，好似《Resident Evil 4：PLATINUM》依家就可以喺iPhone上隨時開戰！

運動類

瘋狂入樽《NBA Jam》

想體驗一下花式入樽的話，就不要錯過《NBA Jam》。遊戲於PS年代已經推出過，雖然畫面唔算太靚，不過大頭公仔加上極度不合常理嘅跳躍入樽，絕對係解悶首選。另外，玩家亦可以無視規則偷波、封阻，非常抵死！

費用：US$4.99

捽芒插花《FIFA 11》

於各大平台都有推出嘅《FIFA 11》，亦移植到iPhone上。典型嘅足球遊戲，畫面、操控皆有高水準表現，即使用iPhone捽芒插花亦相當流暢，最抵讚係連少見嘅美職聯、乙組球隊的資料亦包羅萬有。

費用：US$4.99

喪屍類

刀仔劏屍 《Resident Evil 4 : PLATINUM》

若果鍾情恐怖喪屍遊戲的朋友，一定有玩過日版稱為《Biohazard》嘅《Resident Evil》系列。呢套經典大作終於移植到iPhone，今次選擇的是第四集故事。玩家要扮演美國探員Leon，目的是要拯救兼保護總統女兒Ashley。面對從四面八方湧至嘅喪屍， 要小小翼翼迎戰，絕對膽顫心驚。

費用：US$4.99

射擊類

反機避彈 《TIME CRISIS 2ND STRIKE》

由街機年代去到PS，《TIME CRISIS》系列射擊遊戲都好受玩家歡迎。移植到手機的《TIME CRISIS 2ND STRIKE》當然唔可以揸住槍玩，不過遊戲特別增設反機迴避功能，要避子彈只需反一反部手機就得，夠晒互動，不過玩得耐真係手仔軟。

費用：US$6.99

戰機任揀 《1942 : FIRST STRIKE》

講初代射擊遊戲，一定要數呢隻直向式飛行嘅《1942》。新版叫做《1942：FIRST STRIKE》，畫面經過優化，比起PS以及街機年代靚好多。最好係有幾架唔同設計嘅戰機畀你揀，想攻擊力強抑或速度快都冇問題，不過衰在冇虛擬Joystick，玩落唔就手。

費用：US$0.99

隨意攻擊 《DEAD RISING MOBILE》

如果嫌《生化危機》太陰森，仲有另一隻喪屍大作《DEAD RISING》。今次移植的《DEAD RISING MOBILE》，繼續以CG風格示人。遊戲最好玩之處是玩法相當隨意，完全不需依照劇情推進，更可以隨手拎起武器反擊，勁爽！

費用：US$1.99