《Bulletstorm》子彈轉彎狂射要害

好多射擊遊戲迷都等緊隻延期推出嘅《Gears of War 3》，但呢段時間都可以玩吓由同一製作團隊開發嘅另一套射擊遊戲《Bulletstorm》頂吓癮！雖同屬射擊遊戲，但《Bulletstorm》嘅設定就好唔同，設計上天馬行空，子彈打到識轉彎，而且仲可以用上過百招手法殺敵，打中對方要害仲會加好多分，夠晒創意！

遊戲都係設定喺26世紀嘅未來太空世界，故事講述兩個隸屬Dead Echo維和特種部隊成員Grayson同Ishi被屈兼逐出團隊，之後所乘搭嘅太空船墜落滿布食肉植物、變種人同超巨型怪獸嘅Stygia星球，既要逃出險境，又要搵Dead Echo嘅長官報仇。

發光鬼手吸敵人

話就話有兩個角色，玩到第四版甚至會加多個女角，不過查實只可以控制到Grayson Hunt一個，其餘兩位只係幫大家開路同引路。照推斷《Bulletstorm》喺開發上都有參考過唔少受歡迎嘅射擊遊戲，好似主角可以用發出藍光嘅左手吸起敵人同物件，就真係同《Bioshock》好相似，不過今次呢隻「鬼手」並唔係次次都咁有效，敵人移動得太快就未必吸到。

子彈曉轉追住射

武器方面當然有多款槍械畀大家選擇，不過就算款式再多都好，最多只可帶三支上身，要走到每關隱藏嘅補給站先可以換槍。當中，最搞嘢嘅係一支蠱惑的槍，射出子彈後會切換成子彈的慢動作主觀鏡頭，會見到敵人左右移動閃避，呢個時候就要用右Analog鍵操控子彈轉彎追擊敵人，係就係有違物理常規，不過玩Game又真係冇咩所謂。要升級槍械或購買彈藥的話，就要靠晒每關殺敵所賺嘅分數，只係識遠距離Headshot都唔夠，要用上更花巧嘅招式殺敵先可以愈賺愈多錢。

130種殺人方法

《Bulletstorm》鼓勵玩家去諗更多花招殺敵，想幾殘忍或幾富創意都得。遊戲收錄咗超過130種殺人方法，如果成功做出對應招式，好似不斷狂射敵軍嘅喉嚨而唔射頭，事成後會加唔少分，更會喺成就表上見到。另外，亦可以用番隻「鬼手」，將敵人吸埋身然後一腳伸佢落水，又係另一種「有趣」嘅玩法；想變態啲？仲可以近距離剷起敵軍，然後趁騰空的慢動作時間內，開霰彈槍爆開佢，又或者集中火力攻擊其要害，但要喺電光火石間做出咁高難度嘅動作真係唔易。雖然遊戲同時推出至Xbox 360、PS3及PC三個平台，但購買Xbox 360版《Bulletstorm》嘅玩家，就有機會優先試玩Beta版《GOW3》，射擊迷識揀啦！

遊戲檔案

類　　型： 射擊

開　　發： Epic Games

平　　台： Xbox 360、PS3、PC

推出日期： 已推出

售　　價： $329（Xbox 360）

$380（PS3）

$300（PC）

查詢：3166 6001