Marvel VS. Capcom 3　Combo駁招 炒上天

創作《街霸》系列嘅Capcom，跟開發街機必玩作《拳皇》系列嘅SNK，都先後同美國英雄漫畫開行商Marvel Comic合作，推出《Marvel VS. Capcom》（MVC以及《Marvel VS. SNK》，當中MVC2嘅三打三隊制作戰系統，更贏盡玩家掌聲。事隔十年終於推出第3集《Fate of Two Worlds》，絕對係格鬥Fans們嘅喜訊！

今集遊戲嘅基本玩法沿用三人一組嘅隊制比試，等大家更易掌握及投入，不過新作兩大陣營合共超過30位角色就嚟個大換血，而且畫質表現同人物造型更作出大幅度美化，兼且有更多出招系統畀老手鑽研，就算新手都可以利用「Simple」簡單操控模式來享受遊戲樂趣！

新舊角色 交替接力

《MVC》系列之所以咁多人玩，全因為可以同時使用Marvel英雄人物同Capcom經典格鬥角色作夢幻合作及對決。今集人物雖然唔夠上集多，不過選角就令人耳目一新。Marvel方面會有今年有戲上畫嘅Thor及Captain America等；Capcom方面就一改清一色《街霸》角色，加入其他遊戲角色如《DMC》系列主角但丁、變身超人Joe等，而且使用《街霸4》嘅「MT Framework」3D引擎來開發，以3D繪圖打底，加插美式漫畫獨有嘅粗筆線條和陰暗嘅繪圖風格，齋睇片頭動畫都已經令人目不暇給。

空中換人 連環出招

講起對戰場面真係可以用「亂」字嚟形容，今集要儲能量計Chok超必完全冇難度，所以招來招往嘅驚險場面時有發生。今集就加強咗空戰時嘅空中連技系統，當對手被打到上半空時，可以利用新加入嘅「Team Aerial Combo」，响空中一邊更換同伴一邊駁招，當然對手亦能以「Team Aerial Counter」化解。如果唔識空中駁招嘅朋友，記得响對戰前選定「Simple」模式，簡單地按個掣就可以出到空中連招！另外「Delay Hyper Combo」更能用上三個角色同時發動必殺技，畫面華麗之餘，威力亦相當驚人！

戰鬥風格 完全記錄

本集嘅遊戲模式大致上分成單機及連線兩種，連線模式如《街霸4》一樣，玩家能以自選隊伍同世界各地嘅高手切磋武藝，而且更新增「License Card」來記錄玩家嘅戰鬥風格，攻防擅長全以圖案顯示，出戰前記得檢視一下，咁就知己知彼啦！至於單機模式除保留「Single」對電腦同「Versus」挑戰2P玩家外，「Mission Mode」亦會似《街霸4》一樣有齊每位角色嘅故事任務，贏咗仲會獲得戰鬥稱號同埋人物插畫做獎勵，鍾意儲嘢嘅朋友一定唔好錯過。

機檔案

名稱：《Marvel VS. Capcom 3：Fate Of Two Worlds》

類型：動作格鬥

人數：1-2人（可連線）

平台：PS3／XB360

開發：Capcom

日期：2月17日

售價：$328

查詢：2366 1001

你要識！

周永明（HTC執行長）

* 1997年與王雪紅於台灣創立HTC（宏達電），

主力從事手機代工業務。

* 在1999年推出首部彩色的掌上型電腦，到了2000年更推出首部Microsoft Pocket PC。

* HTC從2006年起發展自家品牌，並於2007年推出品牌首部手機HTC Touch。

* 與Google、T-Mobile合作，推出首部採用Android系統的手機T-Mobile G1。