尖酸評論引Kidult

香港地愈來愈多大唔透Kidult，30、40歲依然沉迷玩具，阿媽老婆一路鬧，佢哋就一路買，誓要追回童年回憶。然而所謂「欲望無限，金錢有限」，就算點買都有銀包乾硬化的一天，所以好難怪玩家們會羨慕玩具Blogger Gary Charm。Gary本身係魔術師一名，不過網誌「魔術師的玩具Blog」唔係寫魔術，而係寫日美玩具為主；而最神奇之處，係佢差不多可以日日買玩具出新Post，所以報道夠晒新鮮滾熱辣，這亦吸引了每天超過200人瀏覽，時至今日瀏覽量已高達40萬人次。

意見中立無掣肘

除了玩具夠新，此網誌另一好處是意見夠中立，可能Gary每件玩具都是以真金白銀買，所以行文不似其他「打手」般受代理所限，所寫所感夠晒尖酸到位。好似1月19日出Post的《新世紀合金Shin Getter One》咁，他就大力批評新三一萬能俠的超合金魂比例怪雞唔討好，不過他就能比較出「新三一」及「舊三一」的斧頭差別，有深厚玩具底子，絕非無的放矢。除了超合金，Gary的藏品還包括幪面超人、咸旦超人、變形金剛及Marvel等等，而且每件都會親自拍攝沙龍，相片質素更媲美專業級，真令人懷疑他的正職究竟是不是攝影師！

網址：http://hk.myblog.yahoo.com/magician_gary