水底食住睇　激巨版魚樂無窮

我熱愛水底，但偏偏唔識游水，好羨慕身邊玩潛水的朋友，可以同一大群魚暢泳，自己就只有去水族館望梅止渴。但隨着海洋公園夢幻水都的開幕，巨型水族館內的海龍王餐廳正式開業，讓我在13米闊的巨型觀賞屏旁，如置身海底般，一邊歎美食，一邊望住啲魚「梳乎」周圍游，爽呀！

說到歷來令我最難忘的電視節目，非《魚樂無窮》莫屬，夜麻麻瞓唔着，睇住螢光幕入面啲魚仔游來游去，實在有趣。而呢場「真魚騷」最近更搬到「海龍王餐廳」，仲要變成3D立體激大版，效果好過甚麼巨幕影院，加上中西日式新派菜、海產特定使用可持續性，富新意又環保，哪有不去幫襯之理？

超闊屏幕 無遮無擋

水族館最令人迷戀的地方，是四面環壁的海底世界，能近距離欣賞深海世界，蘇眉、錘頭鯊，甚至藍鰭吞拿在你身邊四圍游，難怪外國不少水族館都附設餐廳，讓人邊食邊觀賞，甚至宿一宵。可幸我們的海洋公園亦不甘後人，全新主題區的夢幻水都，內裏的水族館一樓便是海龍王餐廳的所在地。甫進去，眼球已被超闊屏幕吸引住，約5,000條稀有海洋生物在你面前「四圍騰」，定過神來，把目光放回餐廳的設計上，以海底王宮為設計理念，用色方面當然是藍色為主，天花的燈光可調成幾十種不同的顏色配搭，地下與椅子都以線條造成漣漪的效果，還有海豚形狀的餐巾環和擺設，加上水與光的折射令餐廳產生獨特的視覺效果，坐在這裏用膳，能完全感受到水底世界那份震撼。

環保海鮮 唔殘忍

坐在水族館內用餐，望住啲可愛魚仔游來游去，口裏卻吃着海鮮，感覺矛盾又變態。但請放心！餐廳的食用海鮮全部根據世界自然基金會《海鮮選擇指引》的建議食用類別，來貨有可持續食品認證，絕不損害海洋瀕危品種，而這類海鮮大部分來自澳洲及北美洲，如東西澳龍蝦、北美象拔蚌等，不損自然生態，大可放心食用。為了提供更多元化的選擇，餐廳以Fusion的烹調手法提供多國菜餚，當中最特別的3款石燒套餐，其中火山石板由師傅燒至攝氏350度再上枱，客人可自行將矜貴的配料，如鹿兒島黑豚肉、澳洲和牛等放上去燒，即時香氣撲鼻，食欲大增，若然冇玻璃隔着，分分鐘吸引鯊魚來搶食！

同場加映：我要食熊貓！

夢幻水都設有3間食店，唔想下下咁重皮去水族館食飯，園內還有湖畔小食及水都餅店供選擇，前者供應司華力腸、雞髀等輕食；後者則有多款糕點甜品，如威威司令曲奇、麵包、沙律等，健怡輕盈，此外餐廳更有不少立體蛋糕，其中以熊貓頭造型最吸引，黑白忌廉夾住雜果忌廉蛋糕，好睇又好食，但記得需一日前預訂。

查詢：3923 2388

Jamie Oliver（英倫型廚）

* 被電視製作人發掘，為英國國家廣播公司的烹調節目《The Naked Chef》擔任主持，憑着年輕和風趣幽默，極速爆紅。

* 成名後，開設「Fifteen」餐廳，專門協助問題青年，培訓他們成為專業廚師。

* 2006年獲英女王授予大英帝國勳章（MBE）。