路中拾遺：男友為何唔諗做咩嘢

女生問我為甚麼男人一旦成了男友，腦袋就退化成嬰孩狀態，約會不再鋪排預備，每次放假見面，問他今天有甚麼節目，他都聳聳肩說沒所謂，沒有刻意想，或者隨便搭枱黐友人派對就當是自己主意，要不，就永遠吃飯看戲唱K，行來行去永遠銅鑼灣旺角，當中的蒼白平庸，比老夫老妻更老夫老妻，甫一想起，立即起雞皮疙瘩。

有女人問男人為甚麼永遠都不會花心思諗兩個人拍拖做咩嘢。男人當然不會說穿，一個男人，對住一個女人，其實只想搞嘢。如果他完全沒有諗過做咩嘢，無嘢好做，兩個人只好回家睇碟打機，結果，就自自然然變成搞嘢。對男人來說，這絕對是最理想又最省錢的美好娛樂與消遣。我可以坦白告訴你們，男人追求你們的時候花費心思搞咁多嘢，最後其實也不過是為了同你搞嘢。所以，搞過後，就不會再花心思諗嘢了。約會中的女人很介意當日的節目，常常問男友今日打算做咩嘢，以及食咩嘢。對很多只懂消費享樂的女人來說，拍拖就是食嘢和買嘢；然而拍拖對男人來說，最理想當然就是「只係搞嘢」，不必花錢買嘢食嘢，搞咁多嘢。一個男人，如果跟你拍拖多年仍然願意花很多心思帶你睇嘢食嘢做好多嘢，這個男人，其實有點心野。試過有男人把自己的正印女友當做白老鼠，帶她試這間店，到那裏玩，充實一日遊，看她反應，問她開不開心，然後，照辦煮碗跟暗裏追求的新歡案件重演，說到尾，男人還是懶惰的。當女人開始忍不住責備男人為甚麼拍拖唔諗做咩嘢，男人就會回一句：做咩×嘢啫？