揀啱色數12生肖路路通

昨日同各位旅遊發燒友講過遠行改運法，今日輪到為各位車迷教路。無論你有幾耐牌齡，想出平安，首要當然係遵守交通條例、小心駕駛，除此之外，好多人都會從玄學角度出發，例如考慮埋車牌號碼及車身顏色，藉此提升個人運勢，今日就請嚟玄學家林炳南，一次過為12生肖嘅駕駛者指點兔年迷津！

今年係辛卯兔年，據林師傅所講，根據五行相生相剋原理，稱為「金木對戰」，陰金剋陰木，代表源遠流長，傷害極大，師傅不諱言：「由於金木對戰，今年嘅交通意外會較多，無論駕駛者或行人都要分外小心呀！」咁大鑊？如果我今年想出車，唔通要打退堂鼓？咁又唔使，師傅已經為每個生肖算好有利嘅車身顏色及車牌數字，有助你提升運勢；唔只咁，編輯部仲根據12生肖特性，作出精選車款推介，祝願各位喺兔年無論想換車或首次出車，都大吉大利、路路亨通！

兔：安全至上

運程概況：肖兔嘅朋友今年犯本命年，容易同人有是非爭拗，工作時更要小心手腳受傷，勸各位兔男兔女要放鬆心情，樂觀面對，問題自可迎刃而解。

吉利顏色：白、金或銀

吉利數字：8

心水車款推介：Volvo S60

唔怕一萬，至怕萬一，都係搵部標榜安全嘅車款至划算；提起安全，富豪（Volvo）梗係大熱之選，新一代S60仲好力又有型，橙金色車款合晒流年。

虎：如魚得水

運程概況：今年屬正官透出之年，事業運強，仲有機會出現新轉變，處理事情如魚得水。感情方面亦與伴侶相處融洽，大有機會談婚論嫁，已婚者更有添丁之喜。

吉利顏色：黃、杏或啡

吉利數字：8

心水車款推介：Porsche 911 Turbo

運程沖天飛，出車梗係想揀朝氣勃勃、段段有勁嘅Model，911 Turbo就勁到冇朋友，500bhp馬力想慢都難，而且身為波子型號，點會冇利你嘅黃色型號呀？

牛：踏實待機

運程概況：今年屬傷官見官之年，轉換工作環境可為你帶來新衝擊，讓你重拾動力，不過處事作風就要踏踏實實，做出好表現，自會得到上司賞識。

吉利顏色：藍、綠

吉利數字：3

心水車款推介：Audi Q5

做人要踏實，揀車就要穩陣，擁有quattor恒式四驅功能嘅Q5就Fit晒要求，直路、彎路都行得四平八穩，而且賣相有動感之餘亦見大方，出得大場面。

鼠：桃花大旺

運程概況：今年為相刑相破年，事業宜守不宜攻，幸好超強嘅桃花抵番晒，單身者大有機會結識到心儀對象；蜜運者仲可以計劃成親，不過已婚者就要注意言行，避免三角戀喇！

吉利顏色：黑、深灰

吉利數字：1

心水車款推介：smart fortwo

桃花咁好，梗係雙座位車款最啱你，smart fortwo就擺明趕走閒雜人等，畀你同另一半遊車河、過二人世界，而且造型可愛，男仔或女仔揸都咁襯你。

龍：把握機會

運程概況：今年乃傷官之年，是非難免，不過只要沉住氣、默默耕耘，自有不俗回報，仲有機會升職加薪，要好好把握，但切忌鋒芒太露，招人妒忌。

吉利顏色：紅、紫或橙

吉利數字：9

心水車款推介：MINI Cooper

既然有職升，又有人工加，出番部車獎勵自己都好應該，不如考慮吓MINI Cooper，形象人見人愛，睇怕到時唔少同事都想你載佢一程，相信有助改善人緣。

豬：成家立室

運程概況：今年乃合太歲之年，運程向好，因有生旺太歲之意，代表家有喜事，單身者易覓伴侶，已有另一半者，不妨於今年拉埋天窗，已婚者更可能添丁呢！

吉利顏色：黑、深灰

吉利數字：1

心水車款推介：Nissan Elgrand

既然屋企多個人，甚至乎唔只一個，七人車自然係Best Choice！大大部嘅Elgrand，足夠容納兩口子、BB，加埋父母及外父外母都得，而且空間感超強，個個都坐得自在。

蛇：長輩扶持

運程概況：今年行相生之年，暗拱財星，正財運不俗，不過由於「暗拱」，容易財來財去，購買實物較為有利。另外今年可得長輩扶持，不妨多與他們溝通。

吉利顏色：藍、綠

吉利數字：4

心水車款推介：Mazda5

相約長輩聚會，最好有部七人車，載得人多又坐得舒服。Mazda5就有6+1編排，尤其是中排嘅三座Bench Seat，可以輕易變成兩張Captain Seat，記住留畀長輩坐。

狗：積極進取

運程概況：今年運程不俗，有意創業者不妨放膽嘗試，打工一族亦可把握機會表現自己，多發表意見，對公司有貢獻，自然得到上司刮目相看，委以重任。

吉利顏色：黃、杏或啡

吉利數字：5

心水車款推介：BMW X1

流年運咁好，更可主動出擊，揀車就唔好咁保守喇！X1屬於全新嘅SAV型號，賣相夠In，而且操控紮實，乘坐感又夠舒適，咁好Feel，話唔定可以刺激新思維。

馬：量力而為

運程概況：今年屬破太歲之年，凡事要以不變應萬變，處事以踏實為上、量力而為，唔好畀金錢沖昏頭腦，作過分投資，或貪圖高薪厚職，小心得不償失。

吉利顏色：藍、綠

吉利數字：4

心水車款推介：Mazda2

既然要量力而為，都係價位相宜嘅入門級車款適合啲，定價約$14萬嘅Mazda2係理想之選，而且整體質素及好玩指數仲有意外驚喜，至於主打嘅綠色款仲有助改運。

羊：逆境彈開

運程概況：今年乃相合之年，凡事得心應手，遇到逆境都會化險為夷。感情方面，男方可送小禮物予伴侶增進感情；女士更大行桃花運，成為眾人焦點，恭喜晒！

吉利顏色：黃、杏或啡

吉利數字：2

心水車款推介：Honda Jazz

要襯桃花運咁旺嘅羊女，Jazz係熱門之選，事關顏色選擇分外多，最Sharp、最搶就係鮮黃色，啱晒今年嘅「羊人」運程需要，而且易操控，女仔都易上手。

猴：運勢強勁

運程概況：今年屬相合之年，所謂合則有情，事業上有新發展，而新轉變有助運程向好，唔只工作順利，而且財運亦相當不俗，整體運程更勝去年。

吉利顏色：白、銀或淺灰

吉利數字：6

心水車款推介：Rolls Royce Ghost

運勢咁好，何妨揀部君臨天下嘅豪車，Rolls Royce嘅至新型號Ghost就夠晒氣派，賣相以至車廂都係至尊級製作，而且有成563bhp馬力，堪稱完美座駕。

雞：安守本分

運程概況：今年犯太歲，整體運程一般，無論投資或工作，都係一動不如一靜，凡事安守本分，有能者自然居之，過於急功近利，小心成為減薪對象。

吉利顏色：白、銀或淺灰

吉利數字：6

心水車款推介：Volkswagen Polo

今年真係有需要出車嘅話，Polo都算係放心之選，由形象以至價位都顯得踏踏實實，唔會有招搖感覺，而且有利你嘅白、銀或淺灰等顏色都係大路之選。