得閒圍脖

Samuel：

這個冬天真太冷!羽絨、Super Warm或太空棉褸之類嘅禦寒衣物統統出場，部分薄褸更宣稱可抵禦零下30℃天氣！還記得小時候上學，老媽子要我着上三件冷衫後再來件藍色棉襖!上周在10℃的早上跟老媽子飲茶，穿上羽絨褸的她說：「以前啲冷衫真係無用，依家呢啲『耳絨』着到成身滾熱辣！」即使冷衫不保暖，不過如果是由老媽子親手編織的話，那份窩心暖意是羽絨無法比擬的。

Simon：

身為汽車版記者，車並不限於一個興趣，也是「搵食」工具。我是個好車之人，尤其是開篷車，鍾意那種自由的感覺，但決不會在香港市區揸開篷車如此「戇居」，皆因我極度討厭廢氣。不過，空氣好的日子也不一定會開車四處去。何解？油費太貴，負擔不來！我想，不少人也跟我有類似想法。須知空氣污染問題非兩、三日可改善，但各位高官可否諗諗計控制油價，讓小市民舒舒氣呢？

Vincent：

幾日紅假啱啱過完，好多朋友包括小記在內今日都要開工，搞到我呢個NBA迷冇得睇熱火對快艇呢場大戰；快艇已經由開季5勝26負嘅魚腩，搖身一變成為接連擊敗公牛、湖人、熱火嘅強隊剋星，反而季初聲勢浩大嘅熱火，自從一月初James、Bosh相繼受傷之後，竟然遭逢四連敗。話雖如此，Big Three個人能力咁強，只要保持水準，相信去到季後賽都絕對有能力同塞爾特人、公牛、魔術等強隊一拚！

Boris：

農曆年放四日假，終於得閒去睇戲，仲要係富有中國特色嘅《讓子彈飛》，其實初時都心大心細，皆因網上影評好壞參半，但睇落又唔係想像中咁差，當中仲有唔少黑色幽默嘅笑位，加埋三位主角嘅鬥智鬥力，係近年唔錯嘅國產片。不過話分兩頭，如果大家以香港人心態去睇嘅話，又真係有啲難投入，睇之前要將呢啲成見放埋一邊，感覺會好好多。

Alfred：

由於小記在港冇乜親戚，所以過年幾日假都冇乜團拜活動，利是錢一直處於低水平，仲諗住自己喺份糧度扣起一啲，湊湊埋埋用嚟買月尾發售嘅3DS！皆因今次3DS售價夠晒嚇人，仲貴過部電視遊戲機，不過基於自己係Game迷，而且想體驗裸眼3D打機嘅樂趣，付出再多都在所難免，等小記試咗部機後，再同大家分享啦！