on.cc 東方互動主頁

Z4長咗仲易舞

新年新希望，各位車迷又有何兔年大計？揸開日本車嘅開篷粉絲，想唔想今年升呢轉揸歐洲車呢？如果你正有此意，寶馬（BMW）Z4 sDrive23iA Roadster應該係你嘅大熱之選，名牌效應唔在講，後驅設定配合紮實底盤，操控靈活又有Fun，開住篷遊車河，夠晒優皮！

新Z4繼承咗第一代E85嘅設計風格，線條大膽又前衞，車頂仲由軟篷改為電動硬摺頂。今次測試嘅sDrive23iA屬於入門型號，力量唔似sDrive35iA咁拳拳到肉，不過馬力都有204hp，0-100km/h只需7.3秒，只要掌握到引擎特性，將轉速好好控制喺2,500-4,000rpm左右，其實sDrive23iA嘅力量表現都唔講得笑。

DSC加CBC　防止甩尾

懸掛設定恰到好處，軟硬適中，支撐力十足，又唔會「扽到甩肺」，反正唔係落Track揸Supercar，唔使個個彎都搏老命，Set到落場賽車咁硬，反而破壞咗Roadster嘅寫意本色。另一方面，Z4採用前置引擎、後輪驅動布局，賦予靈活、動感操控表現，喺DSC及CBC等電子穩定系統輔助下，即使你提早加油出彎，車身動態依然穩穩陣陣，除非你犯上嚴重嘅操控錯誤，或者刻意做出危險動作，否則都好難令車尾外甩，唔理你牌齡有幾耐，揸Z4都唔係難事，大可盡情Enjoy！

軟變硬　20秒兩個Look

今次Z4嘅最大變動係電動硬摺頂設計，只要按吓波棍前方嘅按鈕，20秒就變到身。另一方面，由於車身體積比上一代大，加上車窗面積大幅增加，車廂寬敞度以至開揚度都得到提升。同時，Z4嘅尾箱容積亦去到310公升，加上車內設有多樣化嘅置物間隔，就算係開篷車都有一定實用性。出於安全考慮，頭枕後方裝有翻滾安全防護架，並且大幅強化A柱，將翻車意外造成嘅傷害減至最低。