大師指點夾生肖買開運手機

今日係大年初四，收咗利是錢，自然身痕想買吓嘢玩，換手機相信會係唔少朋友嘅選擇，但風水名師黃震宇卻指出，原來因為手機係隨身物，所以最好跟自己相合相生，否則或會影響流年運程。有見及此，即請黃師傅根據生肖五行屬性，幫大家揀番部行運手機及電話號碼啦！

玩樂兔（屬木）

幸運號碼︰1、3、16、38

肖兔的朋友今年受到「歲駕」星帶動，有機會更換新車，屆時四圍玩樂，最啱帶部槍形DoCoMo F-06B拍攝1,080p高清影片。師傅更話湖水藍色的F-06B五行屬水，咁就可透過水生木原理催旺運程。

是非龍（屬土）

幸運號碼︰4、5、10、25

肖龍者因受到「害太歲」影響，今年人際關係較弱，「六害」星更代表會被人陷害。用火系粉紅色的LG Optimus GT540一來可以催運，還可透過其Facebook及Twitter程式跟朋友增進感情。

孤獨蛇（屬火）

幸運號碼︰3、4、9、27

今年有輕微「犯太歲」，加上有「喪門」及「孤辰」星牽動，有機會有喪事及受到孤立。蛇屬火，本應用相生的木，但蛇是金的長生，因此用金色亦適合。KINGK K800全身金碧輝煌，一於買佢嚟帶旺自己！

添丁馬（屬火）

幸運號碼︰1、9、27、38

肖馬朋友有「天喜」星加持，暗示今年有添丁或結婚的機會。既然喜事接踵而來，一於用屬火系的大紅Ferrari手機，貪其紅噹噹之餘，其500萬像素鏡頭仲可以幫BB仔影番張靚相添！

升職羊（屬土）

幸運號碼︰2、6、8、27

今年有「三台」星拱照，代表步步高陞，打工仔有機會升職加薪。灰銀色的HTC Desire Z可起土生土之效，而且其Full QWERTY鍵盤有利於文字輸入，升職後工作自然更有效率。

小耗猴（屬金）

幸運號碼︰2、7、25、49

屬猴人士今年有「小耗」星作祟，代表有輕微破財的機會，所以買手機應該以平為本。平靚正嘅Samsung Wave 575就最啱，不但符合金生金原理，仲內置《親子王國》、《微博》等手機App，齋玩手機唔出街實慳番唔少。

變動雞（屬金）

幸運號碼︰7、8、18

雞仔雞女今年「沖太歲」，又遇正「大耗」星，運程難免大起大落，所以凡事應以守代攻，並利用土系的Apple產品來補強本運。iPhone 4唔單止有晒型格，仲有大量學習App，一於努力進修，等下年再出發！

貴人狗（屬土）

幸運號碼︰2、6、8、27

在貴人星「龍德」及「紫微」幫助下，今年會得到特別多貴人輔助，遇事總能逢凶化吉。人緣咁好，就算用大紅大紫的四方果Flipout都冇人會話你扮嘢，而且顏色屬火，火生土認真一絕！

驛馬豬（屬水）

幸運號碼︰1、6、16、49

豬仔今年在職場發展順利，兼會「驛馬」星動，代表有機會出國工作。基於「亥（即豬）」的長生是木，所以可用木系的綠色增運。Nokia N8符合要求之餘，更內置28mm廣角蔡司鏡及Xenon閃燈，出國時自然可大影特影。

桃花鼠（屬水）

幸運號碼︰1、6、7、16

肖鼠的朋友今年「紅鸞」星動，加上「咸池」星帶動，要有心理準備異性緣超旺。由於金生水，所以用黑白雙間的金系手機會最適合。SoftBank 945SHG大玩黑撞白，兼預載大量高達鈴聲及主題，在異性前保證Man到爆！

辛勞牛（屬土）

幸運號碼︰2、8、9、10

牛哥牛姐今年冇半顆吉星照耀，凡事多勞少得，幸好火系及土系的手機都能增加吉祥之氣。Huawei IDEOS有齊紅色（火）及黃色（土）底蓋，加上售價親民，搵得唔多都夠錢購買。

單身虎（屬木）

幸運號碼︰3、8、16、38

去年犯太歲的虎仔今年會順遂不少，可惜桃花運不高，單身人士繼續要尋尋覓覓。橙色的Samsung Nori本身屬木，因此符合木生木理論，配合其幻彩閃燈機身，保證可跟心儀對象增加話題。

新年開運小貼士

問︰ 若想增加生意收入，請問可放些甚麼擺設催旺正財？

答︰ 今年代表財星的武曲星在東南位，只要在那裏放置會郁動的物品即可。iHome iA63是不俗選擇，事關它內置「遙控自轉底座」，只要按一按掣即可把iPhone旋轉，夠晒「動」力！

問︰ 若今年犯太歲，應該如何化解？

答︰ 今年肖雞、鼠、馬、龍的朋友均犯太歲，建議用狗仔Wallpaper或手機主題來增運。

查詢︰ （a）2374 0618 （b）3543 7777 （c）2380 6128

（d）3501 6618 （e）3520 1234 （f）3698 4698

（g）800 908 988 （h）2506 3888 （i）2136 6338 （j）3590 8589 （k）2395 3913