《Macross三角邊疆》上完堂揸戰機

經典機械人動畫《Macross》跟普通機械人卡通與別不同之處，係故事中女角感情戲份特別多，令人印象深刻，所以Bandai Namco Games就醒目地將PSP推出過嘅《Macross Ultimate Frontier》遊戲，再加入新作品，新機體動作，以及新增嘅學園模式，可以培育自創角色跟《Macross F》動畫中大班男女人物做同學，體驗佢哋嘅生活。

學園練習 提升能力

前作《Ultimate Frontier》中大家可以創造角色揸飛機作戰，今集自創角色更可以喺「學園模式」內，以學生身分同《Macross Frontier》中嘅角色一齊享受校園生活。大家可以對「心」、「體」、「技」三方面作出鍛煉，而且呢三樣數值會因應自己响學校嘅練習而有所改變。學校會有「一般學科」、「維修」同「基礎訓練」等多個項目，大家完成後除咗可以增加能力值外，仲可以透過同人物對話而引發多達1,000種劇情，十足十玩緊AVG Game一樣！

生存模式 不斷挑機

喺「學園模式」升呢後，仲可以用番自創角色嚟揸戰機，今集嘅「戰役模式」就首次收錄《Macross II-Lovers Again》及完整追加《Macross Frontier》電視同埋劇場版故事，真正玩晒整個Macross世界。另外，喺機體固有多重鎖定系統上，新增咗個別鎖定功能「Single Lock」以增強攻擊力；至於「Charge Break」就係耗盡自身SP嚟抵擋敵人出必殺技，用來保命最啱！最後更有個不斷挑機嘅「生存模式」，方便一班達人挑戰，認真多嘢玩。

遊戲檔案

名稱： 《超時空要塞：三角邊疆》

平台： PSP

類型： 動作+冒險

開發： Bandai Namco Games

日期： 2月3日

售價： $459

查詢：2710 8825